фото врач кова
СОЦИАЛ ИЛЫШ

Поро айдеме кужун ок шоҥгем, маныт

Тидыже, очыни, тыгак. Звенигово районысо Какшамарий ялыште илыше Нина Константиновна Ласточкиналан — 82 ий. Но, тудым ончен, тынар ийым кӧ пуа?! Иктат. Ковай эше тугай чулым да тунар мотор чурийвылышан ӱдырамаш! А кузе сӧралын шыргыжеш?! Ончен куанет. Мутланажат туге шыман да ныжылгын – эре колыштмет веле шуэш.

Тыгай лийын кодаш поро кумылжо дене пырля пашажат ала полшен – Нина Константиновна ӱмыржӧ мучко фельдшерлан ыштен. Йошкар-Оласе медучилищым тунем пытарымыж деч вара 9 ий Липша ялысе фельдшер-акушер пунктышто тыршен. Тылеч вара, сулен налме канышыш лекмешкыже, Какшамарийысе участковый эмлымверыште пашам ыштен. Пелашыже Анатолий Иванович Ласточкин ончыч Липшаште ялсовет председатель, вара партком секретарь лийын. Икмыняр жап гыч  совхоз директорлан шогалтеныт. Но 2007 ийыште ош тӱня дене чеверласен.

Вате-марий кум йочам ончен куштеныт, йол ӱмбаке шогалтеныт. Сергей эргышт Тольятти оласе ик предприятийыште инженер-конструкторлан ышта. Татьяна Кокшайскысе школышто историйым туныкта.  А Тамара аважын корныжым тошка. Тудо Новочебоксарск олаште врач-терапевтлан тырша.

— Ӱдыремлан нигунамат «врачлан кай» манын омыл. Тиде профессийым шке ойырен налын, — мо нерген йодаш шонымем умылышыла, мане Нина Константиновна.

Ончыч ава икшывыже-влакым эмлен гын, кызыт тудын тазалыкшым утларакше Тамара ӱдыржӧ эскера. Таза да кужу ӱмыран лийже манын, чылажымат ышташ тырша. Аваже кеч изишак черланышыла коеш гын, вигак эн сай да пайдале эмым налын конда, ой-каҥашымат пуа.

— Пашаж нерген каласкалымыж годым южгунам иктаж пациентшын тиде але тудо чержым сайынрак эмлаш лийме шотышто мый дечем «тый тыгай годым мом ыштет ыле?» манын, ой-каҥашым йодеш. Шке шонымашем, мутат уке, ойлем, но «лачшымак тыге ыште!» манын нигунамат темлымашем уке. Мемнан жапысе дене таҥастарымаште, кызыт медицине чот ончыко каен. Сандене мый шукыжым ынде омат пале да ӱдыремын ой-каҥашыжлан утларак эҥертем, — ойла Нина Константиновна. — Мыйын пашам ыштымем годым поснак неле черле-шамычым тышечын Марпосадыш наҥгаяш кӱлын. А тунам кызытсе семын машина лийын огыл. Сандене чӱчкыдынак Юл вес велыш пуш але катер дене вончымо. Тудыжат чылаштынак лийын огыл. Кум пӧръеҥ: Василий Валентинович, Пётр Андриянович, Спиридон Иванович  йӱд-пелйӱд – вуйым шупшде, эре полшат ыле. Нунылан кызытат моткоч кугу таум ойлем.   

Мучашлан тыгерак палемдыш:

— Кызыт шукынжо врачым вурсаш, шылталаш йӧратат. Ме гын калыкын моткочак пагалыме еҥже лийынна. Тунам тиде чотак шижалтын.

Любовь Камалетдинова.

М.Скобелевын фотожо.

Опубликовать в Одноклассники