Кугарнян Республикысе мер-политик рӱдерыште Утарышын кечыжлан пӧлеклалтше торжественный мероприятий эртен. Тушто тыгак «Созвездие мужества» конкурсын республикысе йыжыҥыштыже сеҥышыш лекше-шамычым палемденыт.
Пожарный ден утарыше-влакым пофессиональный пайремышт дене Марий Эл правительстве председательын алмаштышыже Степан Воронцов, республикын тӱҥ федеральный инспекторжо Пётр Журавлев, Кугыжаныш Погын председательын алмаштышыже Анатолий Иванов, Йошкар-Ола да Марий митрополит Иоанн саламленыт. С.Воронцов регион вуйлатыше А.Евстифеевын саламлымашыжым лудын пуэн, ты сферыште ыштыше-влакын лӱддымылыкыштым, чрезвычайный ситуацийыште калыклан полшаш эре ямде улмышт нерген ойлен. Ведомствын ветеранже-влакланат посна тауштымаш йоҥгалтын.
Мероприятийыште тенийсе идалыкын паша лектышыжым иктешленыт. Сай паша дене ойыртемалтше-шамычлан наградым кучыктеныт. Тыгак профессиональный мастарлык конкурслаште сеҥыше-влак — эн сай пожарный, утарыше, пожнадзор, ГИМС инспектор, моло специалист — палемдалтыныт. Пайремыш толшо-влакым пожарный ден утарыше подразделенийлан творческий коллективше, йоча-влак мастарлыкышт дене куандареныт.
С.Носова.
