Кугарнян, 14 декабрьыште, Медведево районын тӱвыра да каныме рӱдерыштыже пайрем мероприятий эртен. Тудо районлан 75 ий теммылан пӧлеклалтын.
Марий Эл Вуйлатыше Александр Евстифеевын лӱмжӧ дене ты пайрем дене республикын правительствыжын председательжын икымше алмаштышыже Сергей Сметанин саламлен.
«Экономикым вияҥдымаште да социальный сферыште таче Медведево район ончылно кая. Тендан сеҥымашда нерген республик деч ӧрдыжтат палат», — ойлалтын Александр Евстифеевын саламлымаштыже.
Районын юбилейжым пайремлымаште ты кундемыште шочын кушшо да пашашт дене ойыртемалтше тӱрлӧ профессиян еҥ-влаклан сулен налме наградым кучыктеныт. Нуно Чап лӱм, Марий Эл Вуйлатышын Тауштымашыже да республикын правительствыжын Чап грамотшо дене палемдалтыныт, палдара Марий Эл Вуйлатышын организаций да аналитике виктемже.
Л.Камалетдинова.
