СПОРТ

Россий сборный командылан – шöртньö медаль

Тўнямбал Специальный теле Олимпиадыште Российын командыжлан Марий Эл гыч атлет Сергей Бажин шöртньö медальым ешарен.

Специальный Олимпиаде 14-25 мартыште Австрийыште эртен. Российын командыже тушто 94 медальым сеҥен налын (41 шöртньö, 33 ший, 20 бронзо).

– Элнан сборныйжо Австрийыште моткоч сайын выступатлен, спортсмен-влак таҥасымашын геройжо лийыныт, манашат лиеш. Эн кугу результатым ече дене куржталмаште, курыкышто мунчалтымаште, шорт-трекыште ончыктеныт. Кўварыште хоккейла модмо дене мемнан команде сеҥышыш лектын. Мо-гынат, вийым тергыше чыла участник – сеҥыше, – ойлен  Шереметьево аэропортышто атлет-влакым вашлийме годым Россий Специальный Олимпиадын президентше Юрий Смирнов.

Специальный Олимпиадыште уш-акыл шотышто начарын вияҥше еҥ-влак участвоватлат. Австрийыште тыгай модмаште 107 эл гыч 2600 атлет вийжым терген. Тушто тыгак 1100 тренер ден судья, 3000 волонтёр лийыныт.

Российын чапшым элнан 22 регионжо гыч 79 атлет арален. Участник-влак  спортын тыгай видыштыже таҥасеныт:  флорболышто, кўварыште хоккейла модмаште, фигурный мунчалтымаште, шорт-трекыште, горнолыжный спортышто, снубордышто, ече дене, маскайол дене (снегоступ)  мунчалтымаште.

Палаш оҥай: 2004 ийыште тыгай кўкшытан отборочный таҥасымаште (Петрозаводскышто лийын) Савино йоча пöрт гыч Сергей Коротков ече дене Российын сборный командышкыже логалын. 2005 ийыште Наганошто тўнямбал теле Олимпийский модмаште тудо бронзо призёр лийын.

2016 ийыште  Йошкар-Олаште ече спорт, шорт-трек, маскайол дене всероссийский спартакиаде эртен. Марий Турек районысо Косолап интернат-школ гыч Сергей Бажин ече дене куржмаште 2,5 километрыште икымше верым сеҥен налын. Тыге рвезе Австрийыште эртышаш Специальный Олимпиадын теле модмашкыже Российын сборный командышкыже логалын. Тушто Сергей шöртнö медальын озаже лийын.

Е.Эшкинина.         

Опубликовать в Одноклассники