УВЕР ЙОГЫН

Рӱдерыште… йомак озалана

12 декабрьыште Калыклан психолого-педагогический да социальный полышым пуымо республикысе «Доверие» рӱдерыште кызытсе жаплан келшыше оборудований дене шыҥдарыме сенсор пӧлемым почмо.

Торжественный мероприятийыш Марий Эл правительстве председательын алмаштышыже Илга Дравниеце миен.  

– «Доверие» рӱдерыште тыршыше-влакын шонымашышт шукталте. Ынде психологын пашаже палынак пайдале да йӧнан лиеш. Тыгай пӧлем нерген шуко колынам, да тудын йоча-влаклан веле огыл, кугыеҥ-шамычланат изи йомак гай улмыжым сайын умылем, – манын И.Дравниеце.

Сенсор пӧлемым, чынжымак, юзылан шотлат. Тыште йоча ден кугыеҥ-шамыч лӱдмышт, тургыжланымышт нерген мондат, лыпланат да пуйто йомакыш логалыт. Тидланже тӱрлӧ тӱс, юзо волгыдо да ныжыл сем йӧным ыштат. Пӧлемыште йомак озалана, оптоволоконный манме шӱртӧ шонанпылла волгалтеш, юж шӱвыроҥ кӱшкӧ нӧлталтеш, воштончыш шар пӧрдеш, кайык муро але теҥыз толкынын йӱкшӧ шокта. Сенсор пӧлем, калыкыште тудым эше релаксаций пӧлем маныт, лыпландарыше да луштарыше вийже дене веле огыл, нерве дене кылдалтше ятыр черым сайын эмлымыж денат шергакан.

Правительстве председательын алмаштышыже спонсор, поро кумылан еҥ-влаклан тыгай кӱлешан социальный проектым илышыш пурташ полшымыштлан тауштен.

Сенсор пӧлемым ышташ полшышо-влак кокла гыч пайремыш амалкалче, финанс консультант Сергей Васильков толын. Тудо да пашам пырля ыштыше йолташыже-влак регионыштына ала-мо шотышто тӱнен илыше-влакын пайдаштлан икымше гана огыл полшеныт.

Рӱдерын изи воспитанникше-шамыч пайрем лӱмеш шӱм-чоным тарватыше концертым ямдыленыт. Рӱдерын директоржо Ольга Завойских поро полышкалышыже-влаклан чапкагазым кучыктен, а Илга Робертовнам «мемнан поро феяна» манын.

Тиде кечын шукынжо У ий вашеш эсогыл кугыеҥ-влакын кумылышт шукталтеш манын шоналтеныт…

М.ИВАНОВА.

Опубликовать в Одноклассники

Добавить комментарий