7 декабрьыште республикын правительствыштыже заседаний эртыш. Тудо Федераций Советыште Марий Эл Республикын кечыже-влакым иктешлымылан пӧлеклалтын ыле. Заседанийым республик вуйлатыше Александр Евстифеев эртарыш.
Тудо палемдыш: Россий парламентын кӱшыл палатыштыже Марий Элыште транспорт инфраструктурым вияҥдыме йодыш эн тӱҥ да эн чот каҥашыме лийын.
Тӱҥалтыште вуйлатыше каласыш:
— Кузе Валентина Матвиенко палемден ыле, эше теҥгече кумда Российыште республик мондалтын улмаш гын, таче тудо угыч шкеж нерген кугу йӱкын ойлаш тӱҥалын.
Вара шыргыжал ешарыш:
— Ме сенатор Константин Косачев дене мутланышна. Тудо Марий Эл гыч кондымо чыла кочкышым Федераций Советыште налын да кочкын пытареныт манын каласыш. Республиклан тыгай темлымашым ыштеныт: ялозанлык сатунам жапын-жапын Федераций Советыште ончыкташ да ужалаш.
Умбакыже Александр Евстифеев комитетлаште эртыше заседаний-влак нерген ушештарыш:
— Ме шым комитетыште пашам ыштенна. А субъект-влак тӱҥ шотышто кок-кум комитет дене веле пашам ыштат. Кызытсе жаплан кажныже гаяк ямдылыме шке пунчалыштым колтеныт. Федераций Советын шотыш кондымо тӱрыс пунчал-влак редакцийже 21 декабрьыште лектеш.
Тылеч вара мут республикын правительстве председательжын икымше алмаштышыжын сомылжым шуктышо Александр Сальниковлан пуалте. Тудо транспорт инфраструктурым вияҥдыме шотышто тӱҥ направлений-влак нерген каласкалыш.
Эн ончычак – Йошкар-Оласе аэропорт нерген. Нӧлталтме-шичме полосам уэмден тӧрлатыме паша федеральный окса кӱшеш ышталташ тӱҥалеш.
— Федеральный агентстве ты паша мыняр акыш шушашым уэш шотлен лектын да пале лийын: 2018 ийысе ак дене 2 миллиардат 400 миллион теҥге кӱлеш. А 2008 ийыште тудын кугытшо 800 утла миллион теҥге лийын, — Сальниковын ойлымыж жапыштак палемдыш Александр Евстифеев.
Вес кӱлешан йодыш кӱртньыгорнын Зеленый Дол – Йошкар-Ола ужашыжым чоҥымо дене кылдалтын. Тудо Яранск ден Котельничым уша. Тыге рӱдолана тупик лиймым чарна. Тиде проектым илышыш шыҥдараш 40 утла млрд. теҥге кӱлеш. Александр Сальниковын мутшо почеш, ты йодышым писын рашемдаш огеш лий. Туге гынат 2030 ий марте ыштен шукташ тыршыман.
Вес направлений – республикыште автомобиль корно йодыш. Федераций Советын пунчалже проект дене келшышын, Россий Федерацийын правительствыжлан республикын собственностьыштыжо улшо да Нижний Новгород — Йошкар-Ола маршрутыш пурышо вич корным 2020-2021 ийлаште федеральный собственностьыш кусарышаш йодышым ончаш темлыме.
Тыгак «Дорожная сеть» федеральный проектыш Йошкар-Ола-Уржум корнын 4-ше гыч 10-шо километр марте ужашыжым 2020-2021 ийлаште уэмден тӧрлатыме шотышто пашам пурташ темлыме.
* * *
Федераций Советын еҥже-влак Марий Элын оборонно-промышленный предприятийлашкыже толын каят.
Федераций Советын обороно да лӱдыкшыдымылык шотышто да тӱнямбал паша шотышто комитетше-влак Йошкар-Олаште верыш лекме заседанийым эртараш ямде улыт. Тидын нерген республик вуйлатыше кугарнян эртыше заседанийыште каласыш.
— Кызытеш палемдыме почеш, тиде шушаш ийын апрельыште лийшаш. Сандене ямдылалташ тӱҥалына. Мемнан оборонно-промышленный комплексын заводшо-влакын коллективышт умылышаш улыт: тиде нунын ончыкылыклан шке шонымашышт, нелылыкышт нерген каласаш йӧнышт лиеш.
Тыгак тудо Валентина Матвиенкон мемнан деке толын каяш темлымым кумылын вашлиймыж нерген каласыш. Тыгодым палемдыш:
— Валентина Ивановна тыглай веле огыл, а Федераций Советын 21 декабрьыште иквереш чумырен лукташ ямдылыме пунчал-влакым кузе шуктымым ончаш толеш.
* * *
Тиде заседанийыштак республикын социально вияҥмаш министрже Ольга Федорова Морко районысо Красный Стекловарыште улшо психоневрологический интернатын спальный корпусшын у зданийжым чоҥаш федеральный бюджет гыч 88 утла миллион теҥге ойыралтшаш нерген палдарыш.
Ойлымыж почеш, тиде окса шушаш ийын толын шушаш. У оралте 100 верлан келыштаралтеш.
Тиде йодышым республик Вуйлатыше Александр Евстифеев Федераций Советыште эртыше Марий Элын кечыже-влак жапыште каҥашымашке лукташ темлен. Санденак тушто у оралтым чоҥаш оксам ойыраш ойым пидыныт.
Палдарыме семын: тачысе кечылан Марий Элын калыкым социально аралыме системыштыже 65 кугыжаныш учреждений пашам ышта. Тушто ий еда 10000 утла илалше еҥ ден инвалид-влаклан социальный услуго пуалтеш. 21 стационар организацийыште 2000 утла еҥ ила.
Любовь Камалетдинова.
