Кодшо кечылаште республикын Правительстве пӧртыштыжӧ шуко шочшан еш-влаклан инженер инфраструктуран мланде участкым пуымо шотышто «корно картым» ямдылыме да илышыш пуртымо шотышто межведомственный пашаче группын заседанийже лие. Тудым Марий Эл правительстве председательын сомылжым шуктышо Илга Дравниеце эртарыш.
Мутланымаште палемдышт: 2018 ий 1 ноябрьлан Марий Элыште шуко шочшан 8388 ешым регистрироватлыме. 2010 ий гыч шке илыме верым чоҥаш мланде кумдыкым налаш праван 3 да утларак шочшан 7000 наре еҥым учетыш шогалтыме. Тачысе кече марте тиде йӧн дене 4487 шуко шочшан еш пайдаланен.
Еш-влак деч «Йошкар-Ола» ола округ кумдыкышто мланде участкым пуаш эн шуко (45%) йодмаш пурен.
Апшакплак ялыште шуко шочшан еш-влаклан пуымо мланде участке-влакым инженер инфраструктур объект-влак дене пойдарыме шотышто паша палемдыме план почеш шукталтеш. Тидлан ойырымо окса дене 2013 гыч 2017 ий марте автомобиль корным ыштыме. Тений тиде пашам шуяш республикын бюджетше гыч 25 млн. теҥге субсидий ойыралтын. Тыгак тушко газ пучым шупшыт. 2023 ий марте Апшакплакыште илыше-влаклан вӱдым пуртымо шотыштат пашам мучашлышаш улыт. Электроснабжений шотышто роскотым «Мариэнергон» «МРСК Центра и Приволжья» ПАО филиалже шке ӱмбакше налын.
Заседанийыште Илга Дравниеце Марий Элын Чоҥымо паша, архитектур да илыме вер ден коммунал озанлык министерствылан Кугыжаныш пого министерстве да икмыняр моло ведоство дене пырля шуко шочшан еш-влаклан инженер инфраструктуран мланде участкым пуымо шотышто «корно картым» илышыш пуртымо шотышто мом ышташ кӱлмым радамлын каҥашаш темлыш.
Любовь Камалетдинова.
