«МЭТР» телеканал Марий Эл Республикын тӱшкан пайдаланаш лийме обязательный телеканалже статусым налын. Тиде пунчалым Россий Роскомнадзорын Федеральный конкурс комиссийжын заседанийыштыже пеҥгыдемдыме.
Тӱшкан пайдаланаш лийме региональный телеканал-влак Российын чыла регионыштыжо «Тӱшка информаций средства-влак нерген» закон дене келшышын ышталтыныт. Элысе связьын кабельный чыла операторжо нуным 20 федеральный канал дене пырля шаркалышаш веле огыл, регионысо кажне еҥ увер дене эрыкын пайдаланен кертше манын, яра ончыктышаш улыт. Каналын номерже – пеҥгыдемдыме, 21. Тышечынак лӱмжӧ – «21-ше кнопко».
У телеканаллан стартым декабрьыште пуаш палемдыме.
«МЭТР» кугыжаныш телеканаллан шотлалтеш да культурын кугыжаныш автономный тӧнежшын – республикысе «Марий Эл Телерадио» телерадиокомпанийын – составышкыже пура. Таче кечылан «МЭТР» телеканал – РЕН телеканалын сетевой партнёржо. Республикысе «Марий Эл Телерадио» телерадиокомпанийын чотышкыжо Йошкар-Олаште 105,5 FM частоташте пашам ыштыше «Марий Эл» национальный радиостанцият пура. 2019 ийын икымше пелийыштыже 107,2 FM частоташте «МЭТР — FM» оласе у радиостанций пашам ышташ тӱҥалеш. «Марий Эл Телерадио» тыгак РЕН телеканалын 11 твк II мультиплексышкыже регионысо рекламым вераҥдыме шотышто партнёрлан шотлалтеш.
Республикысе «Марий Эл Телерадио» телерадиокомпанийым 2018 ий январьыште Марий Эл Республикым вуйлатыше А.Евстифеевын пунчалже почеш ыштыме. Тудын учредительже – Марий Эл Республикын Тӱвыра, печать да калык-влакын пашашт шотышто министерствыже.
М.ИВАНОВА.
