Тений 4 декабрьыште Волжский районысо Чодыраялыште илыше Елизавета Матвеевалан 95 ий темын.
Ты юбилейже дене саламлаш районысо ветеран ушем гыч пашаеҥ, районышто калыкым социально обслуживатлыше комплексный рӱдерын директоржо Г.Токманова, «Юл увер» газет редактор Ю.Мастришкина, Корамас администраций вуйлатыше А.Павлов миеныт. Тыгак Елизавета Матвеевам «Чоткар тукым» ансамбльын участникше-влак художественный номерышт дене куандареныт.
Тидын нерген Е.Матвеевалан ончылгоч шижтареныт да юбиляр уна-влакым кумылын вучен, шинчавӱдшымат ӱштылын, администраций велым тыгай тӱткышым ончыктымыштлан куанен.
Пӱрымаш тудым пешыжак чаманен огыл. Тудлан тӱрлӧ нелытым, йӱштӧ-кочым чытен лекташыже логалын, но чылажат ынде эртен.
Россий президентын саламлыме серышыжым лудын лектыныт. Шокшо тыланымашке ушнен, ласкалыкым, пеҥгыде тазалыкым тыланеныт.
Е.Эшкинина.
