Тений Марий Эл гыч Россий Президентын грантшым коммерческий огыл организаций сеҥен налын. Иктыже — «Мы — Региону» мер социально-просветительский организаций лийын. Тудын еҥже-влак Марий Элын Тӱвыра, печать да калык-влакын пашашт шотышто министерствыж дене пырля «Сам себе туроператор» путеводительым ямдыленыт да савыктен лукташ шонат. Нуно пашалан чолган пижыныт.
Проект пашам вуйлатыше Нина Ефимован ойлымыж почеш, тыгай путеводительже регионышто эше лийын огыл. Кеч пытартыш жапыште кундемна дене палдарыше шуко савыктыш ош тӱням ужын. Но иктыжат тӱнямбал практикысе бедекер семын энциклопедий спарвочник гай пайдаланаш келшен огыт тол. Сандене у савыктыш тӱҥ шотышто турист-шамычлан огыл, а шке шинчымашым пойдараш тыршыше-шамычлан пайдале лийшаш. Тӱҥ аудиторийже семын «Марий Эл калык-влакын тӱвырашт ден историйышт» предметым тунемше икшыве, образовательный экскурсийым эртарыше туныктышо, тыгак самырык, пеш поянжак огыл турист ден пенсионер-влак лийыт. Вет тӱрлӧ кундемым ончен савырнаш кумылан-влак коклаште лач ты категорий-влак улыт.
Путеводительым ончыч книга семын лукташ палемдыме. Тудо А-5 форматан да 245 лаштыкан лийшаш. А вара электрон вариантыш кусараш шонымаш уло. Тӱҥ шотышто тушто коммерческий маршрут-влак огыл, а районласе да олаласе пӱртӱс, тӱвыра, историй объект-влак ончыкталтыт. Кугыжанышын але посна еҥын шулдыр йымалнышт улмым шотыш налаш огыт тӱҥал. Санденак путеводительым ямдылыше-влак мемнан лудшына-влакымат ты пашаш ушнаш йодыт. Верлаште илыше-влак шкештат шке турист объектлаштым ты книгаш пурташ шонат гын, тек увертарат. Йӧршеш яра те книгаш логалыда да шке нерген уло тӱням палдарен кертыда.
Путеводителььым ямдылаш да лукташ посна пашаче группым чумырымо. Тидлан тӱрысшӧ 500 тӱжем теҥге ойыралтеш. Книга 500 экземпляр тираж дене лекшаш. Пелыж наре яра лудмыверлашке, тоштерлашке, турист рӱдерлашке колтат. А тудын электрон вариантше дене образовательный сайтлаштат варажым палыме лияш йӧн ышталтшаш.
С.Носова.
М.Скобелевын фотожо
