4 декабрьыште Федераций Советын социальный политике шотышто комитетыштыже кумдаҥдыме заседаний эртен. Тушко Россий Федераций Правительстве ден Марий Эл Республикын кугыжныш кучем органже-влакын еҥышт ушненыт. Мероприятийым комитет председатель Валерий Рязанский эртарен.
Сенатор-влак пенсий законодательствыште ыштыме вашталтышым сайлан шотленыт. Тудо 2014 ий гыч пенсионный накопленийым чумыраш мораторий дене кылдалтын. Закон дене келшышын, нуно 2021 ий марте шуйнат. Палемдыме почеш, тиде РФ Пенсий фондын бюджетшын доходшым 609,1 млрд. теҥгелан ешараш полша.
Тыгак СФ комитет член-влак военнослужащий-влакын пенсионный обеспеченийышкышт вашталтышым пуртымо дене кылдалтше федеральный законым сайлан шотленыт.
Марий Эл Республикын молодежный политике, спорт да туризм министрже Лидия Батюкова регионышто турист отрасльым вияҥдыме нерген докладым ыштен. Тудо палдарен: кызыт республикыште 39 туристический да 8 туроператор фирме уло. Нуно Российысе кугу ола-влак дене кылым кучен пашам ыштат.
Заседанийыште сенатор-влак «Социальный сферыште национальный проект-влакым илышыш шыҥдарыме тӱҥ задаче-влак нерген» йодыш дене «правительственный шагатым» эртарыме нерген мутланеныт. Тушко РФ правительстве председательын алмаштышыже Татьяна Голикова ушнен.
Л.Камалетдинова.
