Теҥгече Москваште, Федераций Советыште, Марий Эл Республикын кечыже-влак тӱҥалыныт. Нуно 3 гыч 5 декабрь марте эртат.
Российысе кӱшыл палатын 25 ияш историйыштыже икымше гана регионлан моткочак кӱлешан тиде событий эрта. Тудын программыж дене келшышын, Марий Эл вуйлатыше Александр Евстифеев Федераций Совет Председатель Валентина Матвиенко дене вашлиеш, тыгак республикын кызытсе социально-экономический сӱретше могай улмо да ончыкыжым кузе вияҥдышаш нерген сенатор-влак ончылно докладым ышта. Тудо «Россий Федерацийын субъектшын шагатше» дене келшышын эрта.
Марий Эллан кӱлешан йодыш-влакым кум кече жапыште Федераций Советын 7 комитетыштыже республикын кугыжаныш кучем органжын еҥже-влак дене каҥашаш тӱҥалыт.
Марий Эл Республикын кечыже-влак Совфедын бюджет да финанс рынке шотышто комитетшын заседанийже гыч тӱҥалыт. Тыгак кум кече жапыште республикын муниципал образованийлаштыже инженерный да социальный инфраструктур объект-влакым чоҥымо, пужен ыштыме да уэмдыме, пӱртӱс дене пайдаланыме сферым, агропромышленный комплексым вияҥдыме дене кылдалтше йодыш-влакым каҥашат.
Сенатор-влак Марий Элыште тӱвыра да исторический поянлыкым аралыме опыт да ончыкылык нерген мутланат.
Тыгак профильный комитетлаште тарифым шотыш кондымо, оборонно-промышленный комплекс предприятий-влакым да туризмым вияҥдыме йодыш-влакым нӧлталыт.
Федераций Советыште Марий Эл Республикын кечыже-влак жапыште регионын историйже да кызыт могай улмыж нерген каласкалыше выставке пашам ышта, тыгак Марий Эл Республикын да сенатор-влакын командышт коклаште футбол да волейбол дене товарищеский вашлиймаш-влак эртат. Тиддеч посна кум кече жапыште Федераций Советын кочмывержын менюшкыжо национальный марий кухньо гыч кум тӱрлӧ кочкыш пурталтеш.
Л.Камалетдинова.
