УВЕР ЙОГЫН

Идалыкыште – визымше йочасад

29 ноябрьыште Медведево районысо Руэм посёлкышто йочасадым почыныт. Тудо школ деч ончычсо шинчымашым пуышо «Родничок» тӧнежын кокымшо корпусшо лийын.

Торжественный церемонийыш Марий Эл Республикым вуйлатыше Александр Евстифеев миен.

«Республикын шушаш ийлан бюджетшым кызыт гына пеҥгыдемденна. Тудо социально виктарыме лиеш. 60 процент утлаже – тиде кажне еҥын тудо роскотшылан, кудо шотышто тудо тӱнен ила. Тиде йочасад тений республикыштына кучемын тыршымыж дене почмо визымше тӧнеж. Тӱҥ налмаште эше 600 верым ешарыме», – палемден тудо.

Регионым вуйлатыше тыгак школ деч ончычсо шинчымашым пуымо сферлан кугу тӱткышым ойырымо нерген ушештарен. РФ Президент Владимир Путинын указше дене келшышын, 2021 ийлан кум ияш марте кажне икшывылан йочасадыште вер лийшаш. Тиде цельлан национальный проект-влак кышкарыште республикышкына федеральный бюджет гыч 1,8 млрд. наре теҥге ойыралтеш.

«Тиде площадкыште кумшо гана улам. Тудын пашажым эскераш, контрольышто кучаш тӱҥалыда манын ӱшанем. Тыште тыгай сынан тӧнежлан кузе кӱлеш, чылажат туге ышталтын. Тиде республикнан ик эн сай йочасадше. Икшыве-шамычлан тыште оҥай лиеш, да нуно кугу кӱкшытыш шуыт манын шонем, молан манаш гын иктат гений ок шоч, тудым воспитатлаш кӱлеш. Икымше ошкылжо – тиде школ деч ончычсо шинчымаш, а республикысе да верласе кучем-влак огыл. Ача-ава-влакынат тыршымышт шергакан», – манын Марий Элым вуйлатыше.

Медведево район администрацийым вуйлатыше Денис Окулов Александр Евстифеевлан муниципальный образованийлан полшымыжлан, тӱткышым ойырымыжлан тауштен.

«Таче мемнан – пайрем, тений районыштына кокымшо йочасадым почына. Тыште ме школ деч ончычсо тӧнежым чоҥымо оралтыш вераҥдыме проектым икымше гана илышыш пуртышна. Сайжым-удажым ынде тудын паша лектышыже ончыкта. Амал дене пайдаланен, Марий Эл Республикым вуйлатышылан 2020 ийлан тиде микрорайонышто 110 веран эше ик йочасадым посна чоҥашлан строчкым пуртымыжан тауштем», – палемден Д.Окулов.

Торжественный ужаш деч вара уна-шамыч йочасадым ончен савырненыт. Марий Элым вуйлатыше медицине кабинетыште, йоча группылаште да пищеблокышто лийын. Тӧнежым вуйлатыше Светлана Зенина йочасадым кызытсе жаплан келшыше чыла оборудований дене шыҥдарыме нерген каласкален. Штатым тичмашын погымо, воспитатель да музыкальный вуйлатыше деч посна йочасадыште эше логопед пашам ышташ тӱҥалеш.

«Тиде йочасадыште 75 икшывылан верым ыштыме. Таче кечылан 38 йочам налме. Молыжо шушаш арнян толыт, кызыт медосмотрым эртат, да лишыл жапыште чыла группым чумырен шуктена», – рашемден йочасадым вуйлатыше.

Светлана Зенинан мутшо почеш, кызыт йочасадыште кум ияш деч кугурак йоча-влакын группыштым чумырымо, ончыкыжым кок-кум ияш ӱдыр-рвезе-влакын эше кум группышт лиеш.

«Йочасад-влакым тений почмо пашана мучашке шуын.Тӱҥ задачына – ончылно. Россий Федераций  Президент Владимир Владимирович Путинын пунчалже почеш республикланна средствам ойырымо, да 2021 ий марте Волжскышто, Йошкар-Олаште, Медведево районышто палемдыме йочасад-влакым чоҥен шуктена. Йочасадыште вер ситыдыме шотышто йодыш шогышаш огыл», – журналист-влаклан манын А.Евстифеев.

Кызыт республикыштына 1300 йочалан ситыше школ деч ончычсо куд тӧнеж чоҥалтме тӱрлӧ йыжыҥыште улыт: Йошкар-Олаште кум у йочасад нӧлталтеш, икте пашам ыштыше тӧнежын пристройжо лиеш, Волжск олаште да Медведево районсо Знаменский посёлкышто ик йочсад дене чоҥалтыт.

Марий Эл Республик вуйлатышын организаций да аналитике виктемжын уверже негызеш М.ИВАНОВА ямдылен.

Опубликовать в Одноклассники

Добавить комментарий