27 ноябрьыште Нижний Новгородышто Россий президентын Юл кундемысе полномочный представительже Игорь Комаров Россий президент В.Путинын кӱштымыж почеш Юл кундемыште илыше-влаклан кугыжаныш наградым кучыктен. Нунын коклаште Марий Элыште илышат лийын.
И.Комаровын палемдымыж почеш, ты торжественный саламлымаш Россий Конституцийын кечыж деч ончыч эртаралтеш.
Марий Эл гыч куштылго атлетике дене Олимпийский резерв училище директорын алмаштышыже Зоя Лютовам «РФ физический культурын заслуженный пашаеҥже» почётан лӱм дене палемденыт. Зоя Фёдоровна Марий Элын спорт школлаштыже 30 ий утла пашам ышта. Тудын воспитанникше-влак ик гана веле огыл всесоюзный да тӱнямбал таҥасымашлаште сеҥыше ден призёр лийыныт. Тачысе кечылан тудоспециалист-шамычым куштымаште кугу пашам ышта. Тудын вуйлатымыж почеш спорт школышто самырык тренер коллективым чумырымо.
– Тендам икте уша: те чыланат сай профессионал да творческий кӱкшытыш шуында, – манын палемден Юл кундемысе полномочный представитель.
Е.Эшкинина.
