Ош лум мландым леведын. Пӱртӱс шке пагытше дене куандара. Ечызе-влакын тургым тӱҥалын. Верлаштат, ӧрдыж кундемлаштат стартыш лектыт.
21-26 ноябрьыште Хакасийыште Хакасийын кубокшо верч ече дене всероссийский таҥасымаште Марий Элын шочшыжо (кызыт ӧрдыж кундемыште ила) Екатерина Смирнова кокымшо верым сеҥен налын. Медведево районын ӱдыржӧ «Виктория» олимпийский резверв спорт школышто шотлалтеш, вич километрыште эрыкан йӧн дене икымше вер деч пыртак почеш кодын.
24-25 ноябрьыште Сыктывкарыште (Коми Республик) «Сыктывкарысе ечыгорно» таҥасымаште регионна гыч икмыняр ечызе вийжым терген. Нунын кокла гыч спорт мастер Дмитрий Чекулаев («Виктория» СШОР», УОР, МРМТ) эрыкан йӧн дене 15 километр кужытышто кокымшо верым налын. Тыгайже шукертак лийын огыл. Жапше годым, 1997 ийыште, спорт мастер Альберт Ямалеев Российын чемпионатыштыже кокымшо верыш лектын. Тылеч вара ты стартыште иктат призёр радамыш логалын огыл. Сыктывкарыштак тиде таҥасымаштак Марий Эл гыч вес тале ечызе Станислав Егоров («Виктория» СШОР) 10 клометрыште классик йӧн дене 10 эн тале спортсмен-влак коклашке логалын. Тиде йӧн дене ечызе-влак коклаште путырак изи ойыртем лийын. Кокымшо вер деч Станислав улыжат 15 секундлан почеш кодын. Ечызе-влаклан сборым эртараш полшымыштлан, транспортым ойырымыштлан УОР-ын вуйлатышыже А.Сидоркинлан, радиомеханический техникумын директоржо В.Даниловлан кугу таум ыштат.
Сай результатым ончыктышо спортсмен-влак 12-16 декабрьыште Пермь крайыште Российын кубокшо верч таҥасымаште стартыш лекшаш улыт.
Сыктывкарыштак 28 ноябрь гыч 2 декабрь марте 2001-2002 ийлаште шочшо ӱдыр-рвезе-влак коклаште всероссийский таҥасымаш лиеш. Кундемна гыч тушто тренер-влак В.Еменгулов ден С.Кугергинын вич воспитанникышт вийыштым тергаш тӱҥалыт. Нунылан пиалан ечыгорным тыланена.
Е.Эшкинина.
Снимкылаште: Ечыгорнышто – Д.Чекулаев; Е.Смирнова Российын юниор командыжын тренерже В.Литвинцев дене пырля.
