Ме, «Марий Эл» газетын пашеҥже-влак, командировкыш лекмына годым вашлиймашым лудшына-шамыч дене эртарашак тыршена. Чон почын мутланаш утларакшым школыш погынена. Ты гана ме Шернур район Кукнур селасе школын тунемшыже, туныктышыжо-влак дене вашлийынна.
Оралтыш пурымына годымак икшыве-влакын марла саламлалтмышт чоным куандарыш. Актовый залыште пӱтынь школ лийын огыл гынат, олмалан пуреҥгаяш вер уке ыле манашат келшен толеш. 7-11-ше класслаште тунемше-шамыч каласкалымынам тӱткын колыштыныт.
Йоча-влак ончылно «Марий Эл» газетын шочмыжо, тудын пашаже, журналист профессийын ойыртемже, шочмо йылме, йӱла нерген тӱҥ редакторын алмаштышыже Светлана Пехметова (ты кундемын шочшыжо) каласкален. Тудак марий йылме ден сылнымутым туныктышо Л.Алмаматовалан икмыняр книгам да марий мутер дискым пӧлек шотеш кучыктен.
Мыйыын, образований да науко йодыш дене редакторын, газетын «Йоча тӱня» ден «Школ йолгорно» лаштыклашкыже возаш таратымем икшыве-влакым сылнымут пашалан мыняр-гынат шӱмаҥда манын шонем. Арам огыл ӱдыр-рвезе-шамыч мемнан дене кылым кучаш кумылан улмышытым ӱшандарен каласышт.
Залыш чумыргышо-влакым «Марий Эл» ден «Сурт-пече» газетлан подпискым ышташ кумылаҥдышна. Йӧратыме савыктышлан подписке декадыште шулдынрак возалташ лиеш манын умылтарышна. Тиде уверым нуно куанен вашлийыч, молан манаш гын Марий Элын ик эн тора кундемыштыже чыланжак огыл Марий телевиденийым ончен, Марий радиом колышт кертыт, санденак республикыштына мо ышталтмым газетла гоч гына пален налыт.
Вашлиймашнам Марий тӱвыра рӱдерын методистше, рӱдер пеленысе «У муро» студийын вуйлатышыже, бард Геннадий Григорьевым поснак пойдарыш. Йоча-влаклан марий семӱзгар, мурын шочмо корныжо, конкурслаште усталыкшым ончыктымыжо, тӱрлӧ кундемыш лектын коштмыж нерген оҥайын каласкалыш. А гитар почеш чапланыше «Ош куэ» мурым йонгалтарымыж годым икшыве-влакын шӱргывылышыштым куан тул авалтыш, санденак «Автобус вашка шочмо ялыш…» мурым чыланат пырля муралтышт.
Кукнур школышто чылаже 208 йоча тунемеш. 2020 ийыште, Марий Элын 100 ияш лӱмгечынже, тунемме вер 150 ияш юбилейжым палемда. Шке жапыштыже ты школышто утларакшым Кукнур селаште илыше-влак гына тунемыныт гын, кызыт тушко тиде ял шотан илемыш пурышо чыла гаяк ял гыч (27 ял пура) икшыве-шамыч тунемаш коштыт. Мутат уке, йолын огыл, нуным автобус шупшыкта.
Школышто марий йылмым шочмо йылме семын туныктат. А кружокышто «Марий калык йӱла» предметым тунемыт. Тудым марий йылме ден сылнымутым туныктышо Людмила Алмаматова вӱда.
– Тиде паша чон йодмо почеш ышталтеш. Ме пӱртӱсын икшывыже улына, сандене йӱланам жаплышаш, аралышаш, йоча-влаклан тидын нерген шукырак палдарышаш улына. А кружок нунын шӱм-чон моторлыкыштым пойдараш полша, – мане Людмила Ильинична.
Кукнур школышто марий калыкын йӱла, историй, тӱвыра поянлыкшым кажне предметым туныктымо годым кучылтыт. Тудым урок деч ӧрдыжсӧ пашашкат пурташ тыршат. Тидыже нуным марий шӱлышаным кушташ полша.
Лидия ШАБДАРОВА.
С.Пехметован фотожо.
