Mediasckop компанийын данныйже почеш, 2017 ийыште йодыштмо сад-пакчазе-влак кокла гыч 1,4 процентше веле телевизорым ок ончо. Тыгодымак ик дачылан шотлымаште кокла шот дене 1,5 телевизор логалеш. Сад-пакча паша деч вара шукынжо телепередаче-влакым ончен канат. Йыраҥ – йыраҥ дене, а увер, «Шӱмсем пӧлек», «Пошкудем», «Андрей Малахов. Вияш эфир» да телесериал-шамыч – расписаний почеш.
Российысе 52 млн. сурт-печылан ола деч ӧрдыжтӧ верланыше 27 млн. пӧрт логалеш (Китай деч вара кокымшо показатель). Тушто цифровой эфир телевиденийым ончаш эн йӧнан.
Таче икымше мультиплексын 10 телеканалжым кугу олалаштат, изи яллаштат ончаш лиеш. «Россия 1» каналыште кече еда лекше «Вести Марий Эл» выпуск деч посна калык «Шӱмсем пӧлек», «Пошкудем», «Шонанпыл», «Изге мечет», «Россия 24» каналыште «Ваше право», «Отличный приём» программе-влакым эскерен сеҥа.
Кокымшо мультиплексын 10 телеканалжым 2018 ий мучаш марте рӱдолаште да тудын лишне илыше-влак веле ончен кертыт. Но тылеч вара кокымшо мультиплекс республикысе чыла пӧртыш миен шуэш. Тунамже тудым ола деч ӧрдыжкӧ лекше 35,9 процент дачник-шамычат ужыт. Цифровой эфир телевиденийын сетьше шуко каналан телевиденийым абонент тӱлымаш деч посна куча. Тидлан приёмникым гына налман. А 2013 ий гыч лукмо DTV-Т2 стандартан телевизорлан дециметровый диапазонан антенне веле кӱлеш.
Таче рынкыште DTV-Т2 стандартан 2500 утла тӱрлӧ телевизор уло, эн шулдыжо 5200 теҥгеш шуэш. DTV-Т2 стандартан цифровой приставке 400 тӱрлӧ наре уло, акше 650 теҥге гыч тӱҥалеш. Эн шулдакан дециметровый антенне 400 теҥгеаш.
М.ИВАНОВА.
