Теҥгече Марий Элым вуйлатыше Александр Евстифеев Российын сайлымаш системыжлан 25 ий теммылан пӧлеклалтше торжественный погынымаште лийын.
Финанс министерствын совещаний залышкыже регионысо Рӱдӧ сайлымаш комиссийын кызытсе пашаеҥже, ветеранже да Марий Эл правительствын еҥже-влак чумыргеныт.
А.Евстифеевын палемдымыж почеш, курымын эртыше чырыкыштыже Марий Элын сайлымаш комиссийже федеральный кӱкшытан кугыжаныш кучем, республикысе верысе самоуправлений органлаш 694 сайлымаш кампанийым организоватлен да эртарен.
«Республикыштына сайлымаш-влакым тӱрлӧ сайлымаш комиссийын вич тӱжем утла членже организоватла – мемнан регионлан тиде пеш серьёзный цифр, да тидыже республикын тыгай пашам пагалымыж нерген ойла», – манын регионым вуйлатыше.
А.Евстифеев Рӱдӧ сайлымаш комиссийын эн сай пашаеҥже-влаклан таумутым кучыктен. Тыге, пашам шуко ий сайын ыштымыштлан регионысо Рӱдӧ сайлымаш комиссий председательын алмаштышыже Вениамин Осокин ден Марий Эл Республикын «Торгово-промышленный палате» ушемын генеральный директоржо Герман Дементьев, республикыштына сайлымашым ямдылыме шотышто пашам сайын ыштымыштлан Рӱдӧ избирательный комиссий аппаратын специалистше-влак Татьяна Бакунина ден Жанна Кряжевских палемдалтыныт.
М.ИВАНОВА.
