СПОРТ

Тыгайже Российыштыжат икте гына

Йошкар-Ола гыч  А.Максимов 2018 ийыште квадратцикл дене ФИМ тӱнямбал кубокын (Кросс-Кантри Ралли, 5 элым, 3 континентым авалтен) озаже лийын.

Тудо Абу-Дабиште, Катарыште, Чилиште, Аргентиныште, Мароккошто вийжым терген. Раллин кажне этапше – тиде 1200-2500 километран вич кечаш марафон. Таҥасыше-влак тӱнямбалсе тӱрлӧ кундем гыч мотоцикл, квадроцикл дене кудалыштмаште  мастарлыкыштым, физически чытышан улмыштым ончыктат да техникын ӱшанлыкшым, спорт командын икоян улмыжым пеҥгыдемдат.

Российысе квадроциклист Александр квадроциклист-влак коклаште Польша, Аргентина, Голландий да моло элла гыч тале соперникше-влакым ончылтен, 105 очком поген,  сеҥышыш лектын. Александрын палемдымыж почеш, тиде тӱнямбал чемпионатыште сеҥымаш тудлан вучыдымо лийын огыл. Тыглай черетан сеҥымаш. Вес шонымаш – Ралли Дакар-2019.

Тудлан сай результатым тыланена.

Александр Максимов 1978 ий 12 майыште Йошкар-Олаште шочын. Пелашыж дене кум икшывым ончен куштат. Спортсменын шке бизнесше уло, таза илыш-йӱлам куча. Икымше квадроциклым тудо 2013 ийыште налын. Тыглай шонымаш хоббишке савырнен. 2014 ийыште спорт тӱняште шкежым ончыктен, Российысе да тӱнямбал кӱкшытан таҥасымашлаште призёр радамыш логалын. 2017 ийыште кок арняш «Африка Эко Рейс» ралли-марафонышто сеҥышыш лектын. Тыгайже Российын историйыштыже икымше гана лийын.

Е.Эшкинина.

Опубликовать в Одноклассники

Добавить комментарий