Волжск олаште Ийготыш шудымо-влаклан социально-реабилитационный рӱдерыште йоча аллейым почыныт.
Торжественный мероприятийыш Марий Эл Республикын социальный вияҥмаш министрже Ольга Фёдорова, «Волжск ола» ола округ администарцийын вуйлатышыжым алмаштыше Дмитрий Анисимов, «Марий Теплосеть компаний» ООО-н генеральный директоржо Иван Антропов да молат миеныт.
Ушештарена, 2018 ий 31 майыште виян мардеж икмыняр пушеҥгым вожге луктын йӧрыктен да тидын дене зданийын леведышыжым, саварым, тӧнежын кумдыкшым чот локтылын. Тиде азап нерген пален налмек, Ольга Викторовна Марий Эл правительствын заседанийыштыже йоча тӧнежым шотыш кондашлан оксам ойыраш йодын. Министрын йодмыжым шуктеныт.
«Волжск ола» ола округ администраций йӧрлшӧ пушеҥгым кораҥдаш, кумдыкым эрыкташ чыла вийжым кучылтын, а «МЦБК» ОАО йоча-влаклан лӱдыкшым ыштен кертше чыла кушкылым пӱчкеден. Тиде пашам ыштыме годым Иван Антропов зданийын леведышыжым олмыкташ да йоча-шамычлан у аллейым шындаш сӧрен да мутшым кучен.
У аллейым почмо годым социальный вияҥмаш министр О.Фёдорова тӧнежым шотыш кондаш полшышо-влаклан тауштен, йоча-шамычлан сеҥымашым тыланен, а Иван Антроповлан таумутым кучыктен. Вашештыме семын Иван Геннадьевич рӱдерысе йоча-шамычлан тазалыкым, пиалым, сеҥымашым тыланен да баскетбол мечым, фотоаппаратым пӧлеклен, шере кочкышым сийлен .
Почётан кажне уна у аллейыш шке пушеҥгыжым шынден, а йоча-шамыч тушко пайремым ушештарыше тӱрлӧ тӱсан тасмам кылденыт.
Мучашлан уна ден йоча-влак кавашке тӱрлӧ тӱсан шарым колтеныт. Рӱдерын воспитанникше-шамыч чыла уналан шке кидышт дене ыштыме сувенирым кучыктеныт.
Фотом Марий Эл Республикын Социальный вияҥмаш министерствыжын сайтше гыч налме.
М.ИВАНОВА.
