29 октябрьыште Кугу Отечественный сарын участникше Михаил Петрович Бяковлан 100 ий темын. Тудын фронтовой корныжо 1939 ий декабрьыште Япон сарыште тӱҥалын да кандаш ий шуйнен.
Михаил Петрович 1918 ийыште Киров область Вӱрзым район Токари ялыште шочын. Тӱҥалтыш школым, ныл классым, тунем пытарымыж деч вара шинчымашым умбакыже погаш йӧнжӧ лийын огыл да колхоз пашаш ушнен.
Икмыняр жап гыч илыш пелашыжым – Анна Александровна Сбоевам – вашлийын. Вате-марийын ӱдыр йочашт шочын, но Михаил Петровичлан ача куаным тичмашын шижын шукташ пиал логалын огыл: самырык жапшым шучко сар лугыч ыштен.
Япон сар жапыште Бяков Дальневосточный фронтышто кредалын, старшина лийын, шочмо элжым тушман деч илаш-колаш арален.
1948 ийыште, шочмо кундемыш пӧртылмекыже, Михаил Петрович угыч колхозышто пашам ышташ тӱҥалын, икмыняр жап озанлыкымат вуйлатен, комбайнерат лийын.
1961 ийыште Бяковмыт еш Волгоград областьыш илаш куснен. Туштыжо Михаил Петрович фермым вуйлатен, комбайнерлан тыршен.
Сарын ветеранже 1987 ий гыч Йошкар-Олаште ила.
Анна ден Михаил Бяковмыт вич йочам ончен куштеныт. Кызыт Михаил Петрович куд уныкаже да уныкаже-влакын 11 шочшышт дене кугешнен ила. Нунат кочаштым чон пытен йӧратат. Нарынчаҥше фотоальбомым лаштыклымыж годым юбиляр 30 ий ончыч илыш гыч кайыше пелашыжым йӧратен, пагален да чон вургыжын шарналта.
Сар Михаил Петровичын илышыштыже, шӱм-чоныштыжо пеш келге сусырым коден, сандене ветеран тудын нерген шарналтен каласкалаш йӧршын огеш йӧрате.
Таче юбилярын тазалыкше ончычсо гай огыл гынат, тудо, боевой йолташыж гай ӱшанле тояшкыже эҥертен, эше шогылтеш, родо-тукымжым, лишыл еҥже-влакым весела кумылжо дене куандара.
Михаил Петрович Отчизным йӧратыме, лӱддымылык да пеҥгыдылык шотышто мыланна пеш сай пример.
М.Бяковым 100 ияш юбилейже дене Марий Эл Республикын социальный вияҥмаш министрже Ольга Фёдороват шокшын саламлен да ветеранлан пеҥгыде тазалыкым тыланен: «Илышым йӧратыме кумылда нигунамат ынже йом, а лишыл еҥда-влак тек тендам шке полышышт да тӱткышышт дене куандарен шогат. Тек кажне кече куаным, сай кумылым конда, вет чыла тиде – кужу илышын негызше. Тендан илыш корныда, шочмо элым йӧратымыда, тудын верч тургыжланымыда самырык тукымлан, мыланна пеш чапле пример!»
М.ИВАНОВА.
