«Мунло» интеллектуал марафоныш ӱдыр-рвезе-влак ынде нылымше гана чумыргеныт.
Мероприятий 2 ноябрьыште Йошкар-Олаште Усталык ушем-влакын пӧртыштышт лийын. Марий Элын районлаж гыч индеш команде чумырген: Марий Турек район Сардаял школ, Советский районысо Ӱшнур школ ден Ургаш лицей-интернат, Морко, Медведево, У Торъял районла гыч сборный-влак, Семёновко селасе 21-ше №-ан, Звенигово район Красногорский, Кужэҥер район Коҥганур школ-влак. Ӱдыр-рвезе-шамыч пӱсӧ уш-акылыштым ныл турышто ончыктеныт. Кажныштыже 10 йодыш лийын.
Икымше тур шочмо кундемын лӱмлӧ еҥже-влаклан пӧлеклалтын. Кокымшышто марий йылме да литератур дене кылдалтше йодыш-влаклан вашештеныт, кумшышто марий йӱлам палымыштым ончыктеныт, нылымшыште Кугу этнографий диктантыште лийше йодыш-шамыч лийыныт.
Конкурс оҥайын эртен. Южо йодышыжым сценке семын «Чон оҥгыр» ансамбль модын ончыктен. Конкурсын заданийжым Марий тӱвыра рӱдерын пашаеҥже-шамыч эксперт-влак дене пырля ямдыленыт. А жюриште историй науко кандидат С.Свечников, педагогике науко кандидат, доцент В.Михайлов, культурологий доктор, профессор Г.Шкалина шинченыт.
Кажне тур ойыртемалтше лийын. Эн сай шинчымашым Советский район Ӱшнур школын тунемшыже-шамыч ончыктеныт. Нуно пуымо чыла гаяк йодышлан вашештеныт. Коеш, сайынак ямдылалтыныт. Санденак тиде команде сеҥышыш лектын. Нунылан дипломым да кубокым кучыктеныт. Кокымшо верым У Торъял районын сборныйже налын, кумшо верым Кужэҥер район Коҥганур школын ӱдыр-рвезыже-шамычлан пуэныт.
Л.ШАБДАРОВА.
М.Скобелевын фотожо.
