Калыкын икоян улмо да Марий Эл Республикын шочмо кечыштлан пӧлеклалтше кугу пайрем Э.Сапаев лӱмеш опер да балет театрыште эртен.
Тушко республикын правительствыжын членже, Йошкар-Оласе администрацийын да районласе вуйлатыше-влак, мер ушем да моло организций-влакын лидерышт погыненыт.
Пайрем дене эн ончычак Марий Эл вуйлатыше Александр Евстифеев саламлен да Россий президент Владимир Путинын саламлымашан телеграммыжым лудын пуэн.
Регион вуйлатыше палемден, 4 ноябрь – Марий Эл Республиклан тыглай кече огыл. Тудо шочмо кундемнан пӱрымашыже верч тургыжланыше, мотор пӱртӱсшӧ да поян историйже, кугезе тукымын сеҥымашыже, самырык-влакын шумо кӱкшытышт дене кугешныше-влакым иквереш уша.
— Россий Федерацийын президентше Владимир Владимирович Путин элыштына илыше тӱрлӧ национальностьян калык-влакын усталыкышт, йӱлашт, ыштыш-кучышышт тӱрлӧ лийме нерген палдарен. Лач нуно икте-весе коклаште кылым саемдаш да икте-весым умылаш полшат. Президентын ойлымыжо мемнан республикыланат келшен толеш, вет тыштат курымла дене тӱрлӧ калыкын шочшышт-влак келшен илат, — палемден Марий Эл вуйлатыше.
Марий Элыште 2017 ийыште Калык-влак кокласе кыл шотышто советын заседанийже эртымымат шарналтен Александр Евстифеев.
— Тӱшка вий дене ме эше шуко сеҥымашке шуын кертына. Мер организаций да граждан обществе институт-влакын пашаштым вияҥден колташ манын, чыла шотыштат йӧным ыштенна, тӱрлӧ верам кучышо да тӱрлӧ ийготан-влакымат пагалена, — ойлен шке саламлымашыштыже регион вуйлатыше.
Республикыштына илыше да пытартыш жапыште шке пашашт дене ойыртемалтше еҥ-влаклан Александр Евстифеев кугыжаныш награде-влакым кучыктен. Нунын коклаште «Марий Эл» газетнан ончычсо пашаеҥже, писатель Мария Илибаевам ужаш куанле ыле. Пайрем кечын Мария Каликаевна регион вуйлатышын кидше гыч «Марий Эл Республикын калык писательже» лӱмым пеҥгыдемдыше знакым да пеледыш аршашым налын.
Залыште шинчыше-влакым тыгак Кугыжаныш Погын председатель Юрий Минаков, РФ Федеральный Погынымашын Федераций Советыштыже Марий Эл Республик деч Константин Косачев да Марий Республикыште тӱҥ федеральный инспектор Петр Журавлёв саламленыт.
Калыкын икоян улмо кечыжлан да Марий Эл Республикын шочмо кечыжлан пӧлеклалтше пайрем погынымашын тӱҥ ужашыжлан, мутат уке, кугу концертым шотлыман.
Ты кечын икымше гана чумыр республикысе марий йоча хор духовой йоча оркестр почеш мурен. Чылаже 600 утла ӱдыр-рвезе мастарлыкым ончыктен. Хор коллектив таче кече марте республикыштына веле огыл, тӱнямбалнат чапланен шуктен, а сводный оркестрым тений сентябрьыште И.С.Палантай лӱмеш тӱвыра да сымыктыш колледжын духовой семӱзгар-влак пӧлка вуйлатышыже Александр Майков чумырен. Кок коллективыштыжат республикысе сымыктыш школла гыч эн талантан икшыве-влак улыт.
Пайрем концертыште нуно патриотизм шӱлышан, кумылым нӧлтышӧ муро-влакым (Российын да Марий Эл Республикын гимнже-влакым, «Тиде – Марий Эл», «Йӧратем мый шочмо элем», «Ах, ты степь широкая», «Песня о родине», «О чём мечтают дети», «Марийский марш», «Весёлый оркестр», «Пусть всегда будет солнце», «Крылатые качели», «Детство я и ты») йоҥгалтареныт. Йоча-влакын мурымышт годым кумыл тодылалтын да чонышто тыгодымак нунын дене кугешнымаш шочын.
Концерт деч вара самырык артист-влаклан Марий Эл вуйлатыше деч шондык тич шере кочкышым налаш моткоч куанле лийын.
А.Байкова.
Д.Речкинын фотожо.
