УВЕР ЙОГЫН

Законым колышташ ӱжын

Марий Элым вуйлатыше Александр Евстифеев Россий Федеральный налог службын республикыштына 2017 ий гыч эртарыме пого налогым жапыштыже тӱлаш ӱжшӧ «Шкендын деч тӱҥал – регионын вияҥмаштыже участвоватле!» акцийышкыже ушнен.

Регионым вуйлатыше пого налогым ФНС-ын сайтыштыже «Налогым тӱлышӧ физический лица-влаклан личный кабинет» гоч палемдыме жап деч ончыч тӱлен да тиде акцийын кӱлешлыкшым палемден, молан манаш гын пого налогым регионысо ден верысе бюджет-влак чумырат, тылеч посна тудо регионыштына корным, школым, йочасадым чоҥымылан да кумдыкым тӱзатымылан виктаралтше социальный программе-шамычым илышыш шыҥдарыше негызлан шотлалтеш.

А.Евстифеев тыгак налогым онлайн формо дене тӱлаш лиймым йӧнан семын палемден. Мучашлан тудо Марий Элыште илыше-влакым законым колышташ да пого налогым жапыштыже тӱлаш ӱжын.

Федеральный налог службын Марий Элысе виктемжын данныйже почеш, 2017 ийлан пого налогым чылаже 752,8 млн. теҥгелан шотлен лукмо, тышечын физический лица деч транспорт налоглан – 612,9 млн.теҥгем, мланде налоглан – 48,2 млн.теҥгем, физический лица-влакын пого налогыштлан – 91,7 млн. теҥгем.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.

 

Опубликовать в Одноклассники

Добавить комментарий