Оршанке район Тошто Крешын ялыште кодшо кушкыжымын кок кугу событий лийын: уэмдымеке, Я.П.Майоров-Шкетан лӱмеш ончерым да угыч «Мастарлык пӧртым» почыныт.
Икымше событийже лӱмлӧ писательын шочмыжлан 120 ий теммыжлан пӧлеклалтын. Тидын вашеш ученый-историк, тоштер пашан чолга еҥже Анатолий Муравьев «Пӱсо перан писатель» проектым ямдылен. Марий Элын Тӱвыра, печать да калык-влакын пашашт шотышто министерстве тудым сайлан шотлен да окса полышым пуэн. Тыге тоштер у сыным налын, экспозицийжым уэмден, пашашке у технологийым шыҥдарен. У экспозицийжым пӧртӧнчылнӧ вераҥдыме, писательын «Ачийжат-авийжат» пьесыж гыч геройжо-влакым ончыктымо. Тыгак у оборудований полшымо дене ынде писательын пьесылажлан шындыме М.Шкетан лӱмеш марий национальный драме театрын постановкылажым ончаш лиеш. Уэмдыме тоштер дене палдараш да лӱмлӧ писатель, драматург, поэт, сатирикым шарналташ М.Шкетан лӱмеш театрын артистше-влак миеныт ыле. Тыгак мероприятийыште Россий Кугыжаныш Думын депутатше С.Солнцева, республикын тӱвыра, печать да калык-влакын пашашт шотышто министр К.Иванов, алмаштышыже М.Матвеев, Марий Эл правительстве председательын икымше алмаштышыже. Васютинын секретариатшым вуйлатыше Э.Чемышев, район администраций вуйлатыше А.Плотников лийыныт.
Толшо уна-влак классиклан шарныктыш воктеке пеледыш аршашым пыштеныт. Тиде кечынак тудым шарнымылан пӧлеклалтше митинг Оршанке посёлкыштат эртен.
Тоштер гыч уна-влак «Мастарлык пӧртым» почмашке кусненыт. Ончыч пӧрт ончылно тасмам пӱчкыныт, вара чыланат кӧргыш пуреныт. Ты у объект «Ялысе тӱвыра пӧрт» Российысе федеральный программын полшымыж дене ышталтын. Но верысе чолга еҥ Виталий Кудрявцевын тыршымыж деч посна лийын шуэш ыле мо ала? Тудланак у пӧртын пашажым вуйлаташ ӱшаненыт. Куд еҥлан паша вер лектын. «Мастарлык пӧрт» ончычсо ялсовет оралтыште вераҥын. Санденак оралтым олмыкташ, чылажымат шотыш кондаш логалын. Сарайым, саварым ешарен ыштыме.
Мастарлык пӧрт кум шӧрын дене пашам шукташ тӱҥалеш: тӱрлымаш, вӱдуа гыч арверым ыштымаш да пушеҥгым обрабатыватлымаш. А тидлан посна пӧлем-влакым келыштарыме. Икманаш, кидпашам шукташ, ямде арверым ончыкташ чыла йӧн уло, кумдыкшат сита. Верысе калыклан, тыгак икшыве, турист-шамычланат тышке толын каяш, кидпаша мастарлыклан тунемаш оҥай лийшаш. Тидым презетацийыш толшо уна-влакат палемдышт.
С.Носова.
М.Скобелевын фотожо.
