26 октябрьыште Юл кундем федерал округышто Россий Президентын полномочный представительже Игорь Комаров Совет Ушем Герой А.Кочетов лӱмеш Чуваш кадет корпусыш миен коштын. Мероприятийыште Марий Эл вуйлатыше Александр Евстифееват лийын.
Таче кечын тиде корпусышто 400 икшыве тунемеш. Марий Эл гыч тушто 6 еҥ шинчымашым налеш. Йоча-шамыч тыглай школ программе денат тунемыт, тыгак тушто Российын воздушно-космический вийжылан специалистым ямдылат.
Чуваш кадет корпус тений 1 сентябрьыште веле омсажым почын. Тудо «КаДетство» проект полшымо дене чоҥалтын. Элыштына тыгай шотан туныктымо заведений коклаште тудо кудымшо лийын.
И.Комаров кадет-влак дене мутланен, нунын кузерак илымыштым ончен лектын. Кадет корпусым ончалын савырнымеке, Игорь Комаров Юл кундем федерал округын патриот шӱлышеш ончен куштымо «Гвардеец» туныктымо да методике рӱдерын презентацийже шотышто совещанийым эртарен. Тушто Юл кундем федерал округыш пурышо регион-влакым вуйлатыше-шамыч лийыныт.
«Гвардеец» рӱдерым Нижегородский кадет корпусышто ышташ палемдыме. Тидын нерген ойпидышым тений 31 майыште Юл кундем федерал округышто Россий Президентын полномочный представительже, Нижегородский областьын правительствыже, Российын ДОСААФ-ше коклаште подписатлыме. Тиде рӱдер самырык тукымым армийлан ямдыла, тӱҥалтыш военный шинчымашым пуа, патриот шӱлышаным кушта.
Л.ШАБДАРОВА.
