УВЕР ЙОГЫН

Шочмо йылме вияҥшаш

25-26 октябрьыште П.Сорокин лӱмеш Сыктывкар кугыжаныш университетыште «Шочмо йылме – кок йылман условийыште» тӱнямбал шанче-практике конференций визымше гана эртен. Тушко Российын 13 регионжо да вич йот эл гыч 240 утла еҥ погынен.

Пленарный заседанийыште йылмым шымлыше-влакын ятыр докладышт йоҥген. А Коми Республикысе  Калык келшымаш пӧртыштӧ «Шочмо йылмым туныктымаште учебно-методический ден цифр йӧным кучылтмаш» площадке пашам ыштен. Тушто шке докладшым МарНИИЯЛИ-н йылме пӧлкажын шанче пашаеҥже Андрей Чемышев лудын. Тудын мутшо почеш, тачысе илышыште национальный  йылмым тунемаш  электрон йылме курс йӧным ышта. Тудым программист веле огыл, компьютер дене пайдаланен моштышо кеч-могай еҥ ямдылен кертеш.

А.Чемышевын командыже ispring.ru онлайн-платформын негызешыже  марий йылмым тунемме базовый курсым ямдыла. Тушто тӱрлӧ урок, аудиовключений, видеоиллюстраций, тест заданий лийыт. Ончыкыжым А1, А2, В1 тӱнямбал моделян кум курс лийшаш.  Варажым туныктен кертше лицензиян организаций дене ойпидышым пеҥгыдемдат, а курсым тунем лекше-шамыч сертификатым налыт. Тыгак шанче пашаеҥ Марий тӱвыра рӱдерын сайтыштыже «Марий йылмым тунемына» видео- ден  мультурокым вераҥдыме нерген каласкален.

Л.ШАБДАРОВА.

Опубликовать в Одноклассники

Добавить комментарий