Калыкын икоян улмо кечыж вашеш, 2 ноябрьыште, Кугу этнографий диктант лиеш. Тиде мероприятий полшымо дене элыштына илыше тӱрлӧ калыкын тӱвыра поянлыкше, йӱлаже, илышыж нерген шинчымашнам ончыктен кертына. Акций элнан кажне регионыштыжо, тыгак СНГ-ш пурышо ятыр кундемыште эрта.
Марий Элыште диктантым 32 вере возат. Чылаже 30 йодыш лиеш. 20 йодышыжо федерал кӱкшытан, 10-жо – шочмо кундем дене кылдалтше. Возымо пашалан 45 минут пуалтеш. Каласыман, ӱмаште акцийыш кундемыштына 600 еҥ ушнен.
Организатор-влакын палемдымышт почеш, диктантым тыгак акцийын официал сайтыштыже возаш йӧн уло. Иктешлымаш 12 декабрьыште лиеш.
Л.ШАБДАРОВА.
