У Торъял поселкысо школышто труд да технологий предметым Александр Анатольевич Мочульский туныкта. Мийымына годым визымше классыште тудын урокшо кая ыле. Йоча-шамыч карандашым оптымо арверым ыштеныт. Школ коридор дене ошкылмо годым туныктышо ден тунемшыже-влакын пашашт шинчалан вигак перныш. Теве мотор панно, пеледышым шындыме полко, молат. Чыла тидым ончалат да куанет.
— Школышто 700 икшыве тунемеш. Мемнан дене коррекционный класс уло. Тудым шымше класс гычак погат, а вара индешымше класс марте нуно иктаж специальностлян тунемыт. Тыгай икшыве дене пашам ыштыме годым поснак кугу тӱткылык, чытыш кӱлеш, — каласыш А.Мочульский.
Коррекционный классыште тунемше-шамыч тунемме программе почеш кок проектым ыштат. Тунемме ий тӱҥалтыште 9-ше классым тений тунем пытарыше-влак кӱртньӧ дене, а мучашыште пушеҥге дене пашам ыштеныт. А теве шымше классыште тунемше-шамыч шӱргӱштышлан сакышым «шочыктеныт».
— Мый ыштышаш кидпаша-влакын чертёжыштым вуйыштем эре кучем. Йоча-влак дене ятыр оҥай кидпашам шочыктена, тӱрлӧ конкурсышто пашанам ончыктена. Мутлан, Йошкар-Олаште эртыше «Мыйын шонымо пӧртем» ярмиҥгашке модыш пӧрт-влакым намиенна. Кажне ийын ПГТУ-што лийше «Шанчыш икымше ошкылем» форумыш лектына. «Пушеҥге – чыла курымлан материал» секцийыште Денис Холматов, Максим Леухин тений кидпашашт дене палдареныт. Максим республикысе да Россий кӱкшытан олимпиадыште мастарлыкшым, уш-акылжым ончыктен, призовой вер дене палемдалтын. Но ситыдымашат уло: пӱчкедыме материал (писте пу) уке. Ондак Килемарыште налына ыле, кызыт тӱрлӧ вере кычалаш верештеш, — мане Александр Анатольевич.
М.СКОБЕЛЕВ.
Авторын фотожо.
Снимкылаште: Кидмастар А.Мочульский — визымше классыште тунемше-влак дене пырля.