Рособрнадзор ОГЭ ден ЕГЭ-м кучышо-влак персональный данныйыштым огыт пу гынат лиеш манын палемден. Экзамен жапыште тыгай тунемшын бланкше гыч штрих-кодым пӱчкын лукташ тӱҥалыт. Регионысо кучем экзаменым эртарыше коклаште тидын шотышто инструктажым эртарышаш.
Персональный данныйым пуыдымо-шамычын иктешлыше кугыжаныш экзаменын результатышт федеральный ден региональный информационный системылаш огыт пурталт. Тугеже нуно экзаменым кузе кучымыштым Интернет гоч ончен огыт керт. Тыгак вузыш тунемаш пурымо годым бакалавр ден специалитет программыла дене шинчымашым налмаште нелылык лектын кертеш.
Л.ШАБДАРОВА.
