УВЕР ЙОГЫН

Каналташ жап шуын

Кеҥеж — каныме пагыт. Окса эре ок сите гынат, келшыше сылне верыш, санаторийыш, кечывалвелыш, йот элыш миен толаш, икманаш, илыме вер деч ӧрдыжкӧ лекташ  кулешак.  Таклан огыл психолог-влакат лач тыге ышташ темлат.  А тидым кызыт профсоюз гоч шулдынрак ышташ лиеш. Марий Элысе профсоюз объединений тудын  первичный организаций радамыштыже шогышо-влаклан  Российысе эн сай профсоюз санаторийлашке 10-20 процентлан шулдырак путевкым налаш йӧным ышта. Тӱҥ условий: льготан путёвкым налаш профсоюз член лийман. Первичный организаций, кушто те шогеда, Марий Эл Республикысе профобъединенийыш пурышаш.

«Профкурорт»

«Профкурорт» — Краснодар крайысе, Кавказысе Минеральные Воды, Крым Республикысе, Московский областысе, Дальний Востокысо, Калининград областьысе санаторий ден пансионатлашке канаш да эмлалташ колтышо ик эн кугу туроператорлан шотлалтеш. Тушко кызыт 400 наре тыгай каныме да эмлалтме вер пура. Лач тудо Марий Эл Республикын профобъединенийже дене ойпидышым ыштымылан кӧра профсоюз член-влалан 10-20 процентлан шулдырак путёвко-влакым ойыра. «Профсоюз путевко» проектыш профсоюз санаторий-влак гына ушненыт.

Путевкым налшашлан теве мом ыштыман:

— шкендан профсоюз комитетыш але предприятийыш льготан путёвкым ойыраш ходатайствым пуаш йодмаш дене лекман;

— профкомын пуымо ходатайствыште Ф.И.О, шочмо дате, йодшын мобильный телефон номерже да ойырен налме санаторийын лӱмжо, канаш шонымо кече чот, номерын категорийже ончыкталтшаш. Тыгак йодмашым возышын ешыжын канаш кайыше членже-влакын данныйышт ончыкталтшаш;

— вара йодмаш да тиде ходатайстве дене Марий Элын профобъединенийышкыже лекман;

— республикысе профобъединений йодмашым «Профкурорт» АО-ш колта.

— 3-7 кече гыч тушеч путёвкын дубликатше да счет толшаш. Дубликатыш профобьединенийын вуйлатышыже кидпалыжым пыштышаш.

— йодмашым пушо счётым налеш да кеч-могай банкыште санаторийыш кайыме деч 21 кече ончыч оксам тӱлышаш, уке гын бронь автоматически кораҥдалтеш.

Тидым палыман

Канаш кайыше-влак корно роскотлан шке гыч тӱлат. Путёвкым налме дене кылдалтше чыла йодыш дене Марий Эл Республикысе профобъединенийын приемныйышкыжо тыгай телефон номер дене лектын кертыда: (88362) 45-25-01.

Могай санаторийым ойырен налаш манын, http://www.profkurort.ru сайтыште ончыман.  

Эше иктым ушештарен кодыман: профсоюзын полшымыж дене каныме путёвкылан кучылтмо роскотын 13 процент налог окса ужашыжым пӧртылташ лиеш.  Тидлан кӱлеш документым гына погыман. Тыгак эмлалтме услугылан налог оксам канаш мийыше пелашланат, 18 ияш марте икшыве-шамыланат пӧртылташ лиеш.

Светлана Носова ямдылен.  

Опубликовать в Одноклассники

Добавить комментарий