КУЛЬТУР ДА ИСКУССТВО

Ӱмыр мучко – «Марий Эл» дене пырля

Вячеслав Леонидович Бирюков Параньга район Элпанур ялыште ила. Тудо ӱмыржӧ мучко «Марий Эл» газетым лудеш, редакцийнан эртарыме лотерейышкыже кажне гана ушна. Тений тудлан пиал шыргыжалын. Пӧръеҥ чапле креслым модын налын. Призлан редакцийышкына Алексей веҥыже, кум ияш Никита уныкаж дене толын.

— Ӱмыр мучко верысе «Победа» озанлыкыште пашам ыштенам, механизатор, вольык ончышо лийынам. Кызыт сулен налме канышыште улам. Республикнан ик эн тӱҥ газетшым шукертак лудам. Изиэм годым ача-авам подпискым ыштеныт, ынде пелашем дене ӱчашен-ӱчашен лудына.  Эртарыме лотерейыштыда кокымшо гана сеҥышыш лектынам. Вич ий ончыч пуэн овартыме матрац логалын ыле. Жал, тений презе Моркыш «кудал колтыш». Ӱшанена, вес гана ты призым ме налына.

Газетыштыда  республикыште лийше чыла событийым тӱрыс почын пуэда, тыгак Марий Эл деч ӧрдыжтӧ илыше марий-влакын илышыштат кумдан ончыкталтеш. Мылам поснак марий йӱла дене кылдалтше статьям лудаш келша, молан манаш гын чимарий улам, кумалтышыш коштам. Санденак редакцийлан кугу таум уло ешна дене каласена. Ончыкыжымат мемнам уверда дене куандарыза, ӧрыктарыза, — мане В.Бирюков.

Л.ШАБДАРОВА.

Д.Речкинын фотожо.

Снимкыште: Тыгай чапле креслыште ача да коча дене шинчылташ моткоч ласка.

Опубликовать в Одноклассники

Добавить комментарий