УВЕР ЙОГЫН

Ялозанлык да корно нерген

Тиде кечылаштак  Александр Ситников Юл кундемысе федеральный округышто Россий Президентын полномочный представительже Михаил Бабичын кӱштымыж почеш Оршанке районыш миен коштын.

Тушто эртыше совещанийыште А.Ситников районын социально-экономический пашаж дене палыме лийын, Россий Президентын указше-влакым шуктымо шотышто кутырен.

Оршанке районысо администрацийын вуйлатышыже Леонид Безденежных кундемыште ялозанлыкын сайын вияҥмыжым палемден: тӱжем гектар мландыш пырчым ӱдымӧ, 700 вуй ушкал деч  ятыр лӱштышым налыт. Но проблеме улмо нергенат каласен коден: Табашино поселко воктенсе корно моткоч уда. Ты трассе дене школ маршрут эрта, сандене тидлан кугу тӱткышым ойырыман. Оршанке районын прокуроржо А.Язынинын мутшо почеш, администрацийлан ты корным тӧрлыдымылан представленийым пуымо. Тудым шуктыдымылан администраций кугу штрафым тӱлаш тӱҥалеш.

Тыгак Александр Ситников Оршанке поселкысо школ воктене йолешкын вончымо вержым ончалын. Переходым оборудоватлыме пашан ик ужашыжым ыштыме – искусственный тӧрсырлыкым, у корно знакым вераҥдыме, разметкым палемдыме. Ончыкыжым печым шогалтат, корным волгалтарат.

Тылеч посна тӱҥ инспектор кӱртньӧ омсам ыштыше «Паллада плюс» ООО-ш, Оршанке тоштерыш  миен коштын.

Л.ШАБДАРОВА.

Опубликовать в Одноклассники

Добавить комментарий