Шочмо кечыже лӱмеш пайрем
Звенигово районысо Олыктӱр ялыште Родион Охотинлан пӧлеклалтше пайрем эртен.
Тыште тиде пайрем поро йӱлашке савырнен да кажне ийын эртаралтеш.
Партизан бригадын чапланыше командиржылан 110 ий темме кечын ты гана 200 утла еҥ погынен. Тиде спорт мероприятий икмыняр ий ончычак район кӱкшыт гыч лектын. Тушко моло кундемла гычак кумылан-влак ушнат.
Тений Эсмекпляк села гыч Олыктӱр марте кросс, лӱйкалымаш дене таҥасымаш, мастер-класс, усталык фестиваль, эсогыл полевой кухньо лийыныт.
«Звенигово район» муниципал образований вуйлатыше Наталья Козлова пайремым эртарыше-влак А.Лебедевлан, Т.Кирилловалан, В.Созоновлан да Э.Молоствовалан Тауштымашым кучыктен.
Л.Камалетдинова.
