УВЕР ЙОГЫН

Шотыш налза

Роспотребнадзорын Марий Элысе управленийжын увертарымыж почеш, эртыше шым тылзыште кундемыштына 77 еҥ вергым тӱкышӧ коля йӱштымуж дене черланен. Ӱмаште тыгаяк жаплан ты чер 3н еҥлан пижын ыле.

Тенийсе теле-шошо пагыт колялан пошаш келшыше лийын, тыгак коклаштышт шучко вирус дене черланыше-влак ешаралтыныт. Еҥ-шамыч утларакше чодыраште лиймышт годым черым пижыктат, мӧҥгыштӧ колям пытараш обработкым огыт ыште.

Управленийыште палемдыме почеш, ты чер утларакше кажне кок-кум ий коклаште шарла. 2017 ий лач тыгай идалыклан шотлалтеш. Черланаш огыл манын, коля тӱшкаш пурышо грызун-влак ваштареш чарныде кучедалман, илыме верлаште уто шӱкшакым эрыктен шогыман да арун кучыман, шкем аралыман. Колям пытарышашлан октябрь-ноябрь тылзылаште паша верлаште да илыме пӧлемлаште чумыр кумдыкышто дератизацийым ыштыман.

Тидлан могай йӧным кучылтман? Тидым ышташ темлалтеш:

— коля ден куголя кочкыш деке да пыжашым ыштыме верыш ынышт логал манын, чыла озанлык оралтыште вишым, рожым петырыман, подвалысе да пӧртйымалсе окнам яндалыман але решоткам шындыза;

— илыме верыште, озанлык оралтылаште, даче пӧртыштӧ, гаражыште колям кучымо наста, лӧдӧ, лӱмын лукмо клей, аяртыме кочкыш полшымо дене грызуным чарныде пытараш тыршыза;

— пурак лекшан пашам шуктымо годым респираторым, пижгомым, тидлан келыштарыме вургемым да йолчиемым чийыза;

— кудалтыме оралтыште але куштыран пӧлемлаште малаш кодаш ида тошт;

— кочкышым коля логал кертдыме верыште кучыза, тудын логалмым ида коч;

— гигиене правилым кече еда шукташ ида мондо: кочмо деч ончыч кидым шовын дене мушса, изи янлыкым але колышо капыштым  кидда дене ида тӱкӧ;

Черланыным пален налмеке (температур чот кӱза, эре вӱдым йӱыкта, шылыж чарныде шуркала), тунамак врач деч полышым йодман. Шке гыч эмлалташ тӧчыманат огыл. Коля йӱштымуж дене черланыше еҥлан лач эмлымверыште веле эмлалтман. Тидым ышташ огыл гын, чер келгыш кая, илыш денат чеверласаш лиеш.

Опубликовать в Одноклассники

Добавить комментарий