Фотограф Иван Речкин Марий Элнан могай ялыште лийын огыл гын? Тыгай верже, очыни, кодынат огыл. Ты пашам шуктымо 40 наре ий жапыште республикна мучко, товатат, тореш-кутынь ик гана веле огыл коштын савырнен. Санденак тудым шукын палат да профессионал семын пагалат.
Иван Никандрович марий кундем деч ӧрдыжтат, йот эллаштат ятыр гана лийын. Кеч-кушко миен толмыж деч вара фотографий-влак газет страницылаште лектыныт. Но тушко чылажак огеш пуро. Тыге шукыжо ончыкталтде кодыт.
Тиде чырым кораҥдаш выставкым эртарыме полша. Кодшо кечылаште, 16 майыште, Иван Речкинын ик тыгай выставкыже Звенигово районысо краеведений тоштерыште почылто. Тудо «Шийгорно» маналтеш. Икмыняр ий ончыч тудо тыгаяк лӱман проект дене келшышын марий-влакын Марий Эл деч ӧрдыжтӧ тӱшкан илыме верлашкышт миен да нунын вургем ойыртемышт дене палдарыше фотографий-влакым выставкыш чумырен, калыклан ончаш темлен.
Выставкым почмо лӱмеш тоштерыште вашлиймаш эртыш. Тушко район администраций, тӱвыра да каныме «Мечта» рӱдер, Чакмарий школ гыч туныктышо ден тунемше-влак чумыргеныт ыле. Погынышо-влаклан фотограф тиде пашалан кунам да кузе шӱмаҥмыж, тунеммыж нерген оҥайын каласкалыш, кажне гаяк фотошто мо ончыкталтме, тудым кушто ыштыме дене палдарыш. Шкеже да пашаж нергне утларак пален налаш шонен, погынышо-влак йодышымат пуышт. Тыгак Иван Никандрович, тудын дене «Шийгорныш» пырля миен коштшо, «Кугарня» газетын журналистше Денис Очиев каласкалыш.
Тиде выставкым Иван Речкин икмыняр жап гыч вес районлашкат коштыкташ шона. А олмешыже тышке сылне пӱртӱс сӱретым ончыктышо фотографий-влакым кондаш палемда. Икманаш, тиде ончер дене гына паша огеш мучашлалт.
Л.Камалетдинова.
Авторын фотожо.
