КУЛЬТУР ДА ИСКУССТВО

 «Черке марий йылмылан, йӱлалан утыр шӱмаҥден»

Лаштыкнан тачысе унаже — уста, талантан, марий  шӱлышан ӱдыр Анна МИШИНА. Тудо кызыт Эстонийыште Сауэ олаште ила.

— Анна, шочмо кундем деч тораште илаш неле огыл?

— Мутат уке, шочмо вер деч умбалне улмо кеч-могай айдемын чонжым туржеш. Но Эстонийыште ятыр марий уло, сандене шочмо йылмем дене кажне кечын мутланем, мӧҥгат ийлан икмыняр гана миен толаш тыршем. Тыгак тачысе илышыште Интернет лишыл еҥ, йолташем-шамыч дене мутланаш сай йӧным пуа. Шочынамже Магадан областьыште, тушто куд ий марте иленам, вара Пермь кундемыш илаш кусненна. Ачамже Пермь край Суксун район Сулий ял гыч, авам Эҥермучаш ялын ӱдыржӧ. Тыгак черке паша дене шуко вере лиялтын.

— Палем, тый Йошкар-Олаштат иленат, тунемынат…

Палантай лӱмеш тӱвыра да искусство колледжыште тунемынам, хоровой дирижирований специальностьым налынам. Вара Чебоксарысе педагогике университетыште музыкально-педагогический факультетыште шинчымашем пойдаренам. Кызыт Тарту оласе кугыжаныш университетыште философий факультетыште тунемам.

— Тый илышет тӱвыра дене кылденат, кутырымаштет келге шонымаш шижалтеш. Тиде мо дене кылдалтын?

Эше Йошкар-Олаште илымем годымак лютеран черкыш кошташ тӱҥалынам. Мыйым тушко писатель Геннадий Алексеев кошташ кумылаҥден. Тудын марий йылме дене эртарыме проповедьше мыйым ты религийлан шӱмаҥден. Очыни, тидлан кӧра илыш умылымашем вашталтын, келгынрак шонкалаш тӱҥалынам, марий йылмылан утыр шӱмаҥынам.

— Кызыт тый черкыште пашам ыштет, а искусство илышыштет могай верым налеш?

— Черкыште мый хорышто мурем. Муро ден куштымаш илышыштем эре кугу верым налыт да налаш тӱҥалыт. Утларакшым мылам ойган мурым мураш келша. Вуз ден ссузышто тунеммем годымат, Эстонийыштат  ансамбльыш коштынам. Кызыт ансамбльнаже шуэн погына, еҥжат тушко шагалрак коштеш. Акрет марий муро дискым лукнем. Тений шыжым чыла сомылым ворандарен шуктена манын ӱшанем. Ты паша ожнысо марий тӱвыранам ончыкылык тукымлан арален кодаш полша. Чынжым ойлаш гын, эркын дене марий йӱлана, йылмына йомын толеш. Мемнан Пермь кундемыштат самырык-влак марий йылме дене шагал мутланат, поснак школышто тунемше-шамыч. Тидыже директорын руш улмыж денат кылдалтын. Тиде чонем моткоч туржеш.

— А Эстонийыште марий шӱлышым арален кодаш неле?

— Уке, мый Марий Элыш толмеке, марий шӱлыш шагалрак улмым чотрак шижам. Поснак Йошкар-Олаште марий ӱдыр але рвезе дене марла пелештымеке, нунын рушла вашештымышт мыйым ӧрыктара. Ме Эстонийыште шочмо йылмына дене утларак кутырена манын шонем. Очыни, тораште улмына мемнам йылмынам, тӱвыранам утларак перегаш тарата. Тыгак политике шотышто шыгыремдылмым пырчат огына шиж. Шочмо йылмына дене лӱдде мутланена, марий концертым эртарена.

Лидия ШАБДАРОВА мутланен.

М.Скобелевын фотожо.

Опубликовать в Одноклассники