Хор дене мураш шӱмаҥдат
Национальный президент искусство школышто 6-10 июньышто кеҥежымсе вокал да хор мастерской пашам ышта. Тудо хор дене мурымым калык коклаш шараш, музык искусствышто ты направлений дене пашам ыштыше педагог-влак деч опытым погаш йӧным ышта. Тушко ты школын веле огыл, Йошкар-Оласе 7-ше №-ан, П.Чайковский лӱмеш, Звенигово районысо Кужмарий да Киров кундемысе искусство школ-влакын тунемшышт ушненыт.
Мероприятийыште М.Глинка лӱмеш йоча искусство школын «Перезвоны» йоча хорн вуйлатыше, Санкт-Петербургысо кугыжаныш культур институтын академический хор кафедрыжын преподавательже, хормейстер Лариса Ярицкая, хор дирижер, Россий композитор ушемын еҥже Сергей Екимов мастарлыклан туныктат.
Усталык школ пашам ыштыме жапыште открытый занятий, мастер-класс да искусствышто кугу кӱкшытыш шушо мастар еҥ дене вашлиймаш-влак эртат.
А.Байкова.