ОБРАЗОВАНИЙ

Урокшо юзо тӱняш пурта

Шернур район Кукнур школын труд ден технологий кабинетышкыже пурымо годым шинчалан пу гыч пӱчкеден лукмо, кагаз гыч, руаш гыч ыштыме тӱрлӧ оҥай арвер-влак шинчалан вигак пернат. Кажне пашаште ала-могай порылык ден юзо вий шижалтеш. Тунамак иктаж ӱзгарым ышташ шкемынат кумылем лекте. Тыгай моторлыкым шочыкташ полшышо туныктышо дене лишкырак палыме лияш кӱлеш манын шоналтышым.  Тудыжо тыштак лийын. Валентин Алгаев йыр  икшыве-влак юарлен, куанен пӧрдыныт. Тудын дене мутнам вашталтышна. 

— Валентин Петрович, школышто ынде ятыр ий тыршеда. Икшыве-влакым предметланда кузе шӱмаҥдеда?

Нунын дене шыман, ласкан мутланыман. Урок годым вурседылме шомак лийшаш огыл. Кабинетышкем пурымеке, йоча-шамычлан шыдыштым, осалыштым омса шеҥгелне кодаш йодам. Ме тыште чыланат иза-шольо, ака-шӱжар улына манам. А парт коклашке пурен шичмекышт, поснак шинчалан руаш дене пашам ыштыме годым, ты материал юзо шӱлышан манын ойлем. Тыгодым руашын ик ужашыжым шеҥгекем шылтем да тушто иктаж оҥай янлыкым але кайыкым шочыктем да луктын ончыктем. Нуно вигак ӧрыт да кидпашалан кумылын пижыт. Икшыве дене туныктышо шкежат йоча кумылан лийшаш. Тыгак тудо чонышкыжо пуртыжо манын, ятыр тыршыман, тунамак йодынат моштыман.

— Тений апрель мучаште Те «Шӱмем йочалан пӧлеклем» республик кӱкшытан конкурсышто сеҥышыш лектында. Тыланда тиде вучыдымо лийын?

Кажне сеҥымаш вучыдымо, манаш лиеш. Шкем мокташ, ончыко лукташ ом тырше. Мылам икшывын кумылжо шергырак. Нунын пу, чия, руаш да моло материал дене куанен пашам ыштымыштым ужмо шергырак. Туге гынат кеч-могай конкурсышто лийме ончыко ошкылаш, у кӱкшытым налаш тарата, йоча дене пашам ышташ кумылаҥда.  Тыгак вес педагог-влакын методикыштымат ончаш оҥай да пайдале ыле. Тыге ме шуаралтына, кушкына, икте-весын опытшо дене пайлалтына.

— Кукнур школышто могай кружокым вӱдеда?

Шинчалан руаш гыч ненчена, газетым  пӱтырен пунчена. Тыгак сӱретлыме ден пу гыч пӱчкедыме кружок-влак улыт. Ненчыме кружокыш 20 еҥ, сӱретлаш 14 ӱдыр-рвезе, пу гыч пӱчкедаш 29 тунемше, тодмашке 15 йоча коштыт. Кызыт ме газетым пӱтырен, пунчен гына тӱрлӧ арверым ыштена, варажым вӱдуа гычат тодыштын пидаш тӱҥалына. Ты кружокыш коштшо коклаште 5-ше класс гыч Валентина Русиновам, Ксения Столяровам палемдыме шуэш. Нуно тыршен пашам ыштат. Руаш гыч мотор арверым 3-шо классым тунем пытарыше Арина Алгаева, Полина Актуганова, Рома Жуков да 1-ше класс гыч Дарина Пидалина ыштат. А теве пу гыч пӱчкедаш шукыштлан келша. 6-шо класс гыч Кирилл Ешеевым, Никита Мамаевым, 7-ше класс гыч Олеся Войкинам, Алеся Шабалинам, Света Ширшовам, 9-ше класс гыч Антон Войкиным, молымат палемдаш лиеш. А теве сӱретлымаште 5-ше класс гыч Диана Михайлова ойыртемалтеш. Тудо кажне занятийыш кумылын коштеш.

— Тендан шонымаште, тунемшыда-влак ончыкыжым илышыштым творчестве, тӱвыра дене кылдат?

Каласаш неле. Очыни, икмынярынже сӱретче але уста кидмастар лийыт, но чылан огыл. Мый шкежат нунылан ойлем: «Шӧртньӧ кидан лийыда гын, илышыште огыда йом». Поснак пу дене пашам ыштен моштышо-влак эре кӱлыт. Нуно плотникат, столярат, уста чоҥышат лийын кертыт. Тыгак творческий шӱлышан  еҥ-влак чонышт дене порырак улыт. Мыйын шонымаште, тидыжее нелылык гыч лекмаште сайынак полша.

Лидия ШАБДАРОВА.

Авторын фотожо.

Снимкылаште:0653 – В.Алгаев ден Д.Михайлова могай пашам тӱналме нерген каҥашат.

Опубликовать в Одноклассники

Добавить комментарий