КУЛЬТУР ДА ИСКУССТВО

«Тый мемнан Рианна улат!»

«НТВ» канал дене «Ты супер!» передачыште Волжский кундемын чолга ӱдыржӧ Арина АКАНАЕВАН мурымыжым колмеке, тудын дене лишкырак палыме лияш кумыл шочо. Ӱдыр Волжск олаште Йоча да самырык-влаклан реабилитационный рӱдерыште ила.

— Телепередачыште мурызо Ёлка тыйым тӱнямбалне палыме мурызо Рианна дене таҥастарыш. Тыге мокталтыме тыйым тӱвыра корно дене умбакыжат каяш таратыш мо?

Илышем мурымаш дене кылдынем. Индешымше класс деч вара Палантай лӱмеш тӱвыра да сымыктыш колледжыш тунемаш пураш шонем. А конкурсышто вес турыш эртен кертын омыл гынат, кумылем чотшак волен огыл. Да, телеэфирыште шортынам, но вараже шке ситыдымашем умыленам.

Мураш мыйым нигӧ туныктен огыл. Рӱдерын кажне гаяк мероприятийжылан келшыше мурым ойырен налам  да чоным, моштымашем пыштен мурем. Мылам Рианнан, Сиан, «Серебро» группын, Полина Гагаринан, Наргизын, Дима Биланын мурымышт келша. Кеч-могай йылме денат мурен кертам, лач йӱкым чын шындаш, южым налын мошташ тунемман.

— Тылат Российын артистше-шамыч дене мутланаш логалын. Ӧрмалгымаш, лӱдмаш лийын огыл? нунын нерген могай шонымаш шочын?

Нуно тыглай еҥ улыт. Шкеныштым кугуэш огыт уж, простан мутланат, мыланна каҥашым пуат. Мылам поснак Виктор Дробыш да Ёлка дене кутыраш келшен, тыгак Игорь Крутой, Маргарита Суханкина, Стас Пьеха дене вашлияш пиал шыргыжалын. А передачым вӱдышӧ Владимир Такменёв моткоч поро кумылан.

— Арина, ача-ават улыт гынат, тый ала-молан рӱдерыште илет. Амалже могай?

Ешем дене илыме годым уда койышан ӱдыр-рвезе-влак дене кылым кученам. Мӧҥгӧ гычат лектын куржынам, шылын коштынам, но вара йоҥылышем умыленам,  ковам деке илаш кусненам, а варажым рӱдерыш толынам. Кызыт ача-авам мый декем толын каят. Ачам сеҥымашемлан куана.

— Кызытсе самырык-влак шкеныштым тӱрлӧ семын тергат, чыла вере шукташ тыршат…

— Мыят тыгаяк улам. Мурымаш деч посна спорт дене кылым кученам. Рӱдерын чапшым иймаш дене соревнованийлаште араленам, но шӱм черлан кӧра кызыт тидым ыштен ом керт. Ик жап тӱрлӧ ойлымашымат возенам.  Ончыкыжым юрист специальностьым налнем.

— Илыш тӧрсыр дене тӱкнышӧ йоча-влак коклаште лийме тыйым вашталтен?

Чынжымак, кызыт мый йӧршын весе улам. Сай корныш шогалаш шӱкалтышым ыштымылан, уда корно гыч кораҥаш полшымыштлан рӱдерын воспитательже-шамычлан тауштем. Тыгак йолташем-влакынат умылымышт илаш, ончыко ошкылаш вийым пуэныт. Шкежат ача-ава деч посна кодшо йоча-шамычым лыпландарем, каҥашым пуэм, полыш кидым шуялтем. Мыйын шонымаште, тачысе самырык тукым чулым лийшаш, лӱдын, ӧрын шогышаш огыл, тыгак еҥым умылен моштыман, шкем тудын верыш шындыман. Тунам гына чын, поро шӱлышан айдеме кодаш лиеш.

Лидия ШАБДАРОВА мутланен.

Опубликовать в Одноклассники