Кугу Отечественный сарыште Сеҥымылан 72 ий темме кечылаште Российысе кӱрньӧ корно холдинг сарын инвалидше ден ветеранже-влакым фирменный, пассажирский, писын коштшо да пеш писын коштшо «Сапсан» поездласе купеан вагонышто яра кудалыштыкта, а Слава орденын тичмаш кавалерже ден Совет Ушемын Геройжо-влак «Сапсан» поездын бизнес-классше дене яра пайдаланен кертыт.
Тыгай акций кечылаште, 2017 ий 1 гыч 10 май марте, нуно кеч-мыняр гана кудалын кертыт . Тыгак Кугу Отечественный сарын инвалидше ден ветеранжым ик еҥ яра ужатен коштын кертеш.
Оксам тӱлыде билетым кассылаште 2017 ий 15 март гыч налаш тӱҥалаш лиеш.
Ты акцийын цельже — Кугу Отечественный сарын инвалидше ден ветеранже-влаклан фронтовой йолташышт дене вашлиймашым пӧлеклаш, нунылан сар лийме верлашке миен толаш, сареш вуйыштым пыштыше йолташыштын шӱгар ӱмбакышт пеледышым пышташ йӧным пуаш.
Ӱмаште тыгай акций почеш республикыште 1123 билетым налыныт. Тӱҥ шотышто ветеран-влак Москвашке, Санкт-Петербургыш, Белгородыш, Псковыш, Нижний Новгородыш, Адлерыш, Курскыш, Брянскыш, Волгоградыш, Вологдаш, Воронежыш миен коштыныт.
Е.Садовин.
