Пеледыш пайремыште Сеҥымашын ХХХ-шо идалыкше лӱмеш тӱвыра полат воктенсе площадкыште «Саскавий» марий ӱдырамаш ушем «Пеледышлан – пеледыш» конкурсым эртарен.
Тушко Марий Элын тӱрлӧ районжо гыч 10 ӱдырамаш ушнен. Конкурсант-шамыч пеледыш гыч тӱрлӧ оҥай композицийым, аршашым, вуйшӱдышым, аппликацийым ыштеныт. Тыгодым нуно пашаштым почын ончыктеныт. Икте пеледыш нерген муралтен пуэн, весе оҥай сценкым ончыктен, кумшо шке возымо почеламутшым лудын, нылымше весела сем почеш кушталтен.
Калыклан Звенигово кундем гыч толшо ӱдырамаш-влакын номерышт поснак келшен. Нуно пеледышым марий калыкын акрет йӱлаж дене кылденыт, тудын илышыштына могай верым налмыжым ончыктеныт.А теве Марий Турек район гыч Светлана Конышева республикнан ик эн тора кундемже гыч оҥай пеледыш композицийым конден. Тудын пеледышыже велосипед денат «кудалыштын», издер денат «мунчалтен». А Советский район Ӱшнур гыч Галина Волкова жюрим шке возымо почеламутшо дене ӧрыктарен.
Тыге жюри икымше верым Марий Турек район гыч С.Конышевалан, кокымшым Звенигово район гыч В.Музуровалан, А.Царегородцевалан, З.Созоновалан, кумшым Советский район гыч Г.Волковалан пуэн. Тыгак Россий тӱвыран сулло пашаеҥже А.Шакировалан посна призым кучыктеныт.
М.Скобелевын фотожо.
Снимкыште: С.Конышева (пурла гыч икымше) ден Марий Турек кундемын чолга ӱдырамашыже-влак «Пеледышлан – пеледыш» конкурсышто ик эн ойыртемалтше пеледыш композицийым ыштеныт.
