Шинчымаш кугорнышто
Отличнице-влакат тургыжланат
Тунемме идалык койын мучашке лишемеш. Тидым школышто тунемше кажне йоча куанен вуча докан. Вет кеҥеж каникул жапыште иктышт лагерьыш, весышт ача-ава дене пырля теҥыз воктеке каят. Лач латикымше классын тунемшыже-влак ты пагытым тургыжланен вашлийыт: иктешлыше контрольный паша, ЕГЭ да молат.
Волжский районысо Помар школым тений лу йоча пытара. Нунын кокла гыч Марина Дмитриева, Мария Жиркова, Анастасия Ефимова чыла «визытан» отметкылан тунемыт гынат, ЕГЭ-м эртыме шотышто моткоч тургыжланат.
— Школышто туныктышо-влак, мӧҥгыштӧ ача-ава тидын шотышто мемнан семынак шонат, вет нунын тунеммышт годым билет почеш экзаменым сдатленыт, — ойлат ӱдыр-влак. — Но вес могырым ончалаш гын, ЕГЭ дене кугу баллым погет гын, нимогай нелылык деч посна ойырен налме вузыш тунемаш пураш лиеш.
Ӱдыр-влак тунемме идалык мучкат тыршеныт, тӱрлӧ предмет дене олимпиадыш коштыныт, школын, районын чапшым араленыт, сеҥыше-влак радамыш лектыныт.
Мутлан, Мариналан биологий, химий предмет-влак келшат, сандене ончыкыжымат илышыжым медицине дене кылдаш шона.
А Анастасия школ деч вара гуманитарный да экономический направлений дене каяш шона. Тудлан шымлымаш пашам эртараш келша. Ӱмаште Марина дене пырля Йошкар-Олаштат научно-практический конференцийыште икымше вер дене палемдалтыныт.
— Шкенан районысо сулен налме канышыште улшо-влакын кузе илымыштым шымленна. Кугурак ийготан-влак дене уремыштат йодыштмашым эртаренна, южышт деке мӧҥгышкыштат миенна. Шкетан тыгай пашам шукташ куштылго огыл, сандене мыламат пырля тунемме йолташ-влак полшеныт, — палемдыш чолга ӱдыр Анастасия. — Тыгай йодыштмаш деч шукынжо шекланат, но мыскара йӧре вашештыше-шамычат улыт.
Тиддеч посна Настя кодшо ийын математике, англичан йылме, историй, общество, право, ИКН, технологий дене олипиадыш миен. Пытартышыж дене ӱмашсе семын теният республикыште икымше верыш лектын, а молыж дене сеҥыше-влак радамыш логалын.
— Мый ачам семын техникым йӧратем. Мӧҥгыштат иктаж-мо пудырга гын, ачален кертам, — палдара Мария. — Ӱмаште информатике дене олимпиадын республикысе этапше Юл кундем технологиий университетыште эртен. Коло вич тунемше гыч шкетын веле ӱдыр лийынам.
Мариялан информатике дене ешартыш шинчымашым ачаже пуа, вет тудо жапше годым школышто физикым тунктен, а кызыт инженер-программистлан пашам ышта.
Ӱдыр-влак тыршат, тунемыт, чыла йодышлан вашмутым шке кычалыт, школын веле огыл, районын чапшым кӱшкӧ нӧлтат. А нуным ончен, шольо-шӱжарыштат изинек шкеныштым пеҥгыдын кучат, тунеммашлан кугу тӱткышым ойырат.
— Шӱжарем чылт мыйын гаяк, — ойла Марина. — Чылажымат шуко шонен, радамын ышта. Шонымыжым ок шукто гын, огешат лыплане. Тудланат медицине келша. Мылам тукым акам пример лийын: тудо «визытанлан» гына тунемын, школым шӧртньӧ медаль дене пытарен.
Ӱдыр-влак вашештат:
— Пырля тунемшыда-влак полышым тендан деч йодыт?
— Йодмышт годым полшена, иктаж темым умылен шуктен огытыл гын, пырля каҥашена.
— Отличнице лияш куштылго мо?
— Кӱкшӧ результат лийже манын, шуко тыршаш кӱлеш, шкет деч пеҥгыдын йодын моштыман.
— Пашадыме-влак шукемыт. Тыгай сӱрет ынже лий манын, мом ыштыман?
— Тунем лекше студент-шамычлан опытым погаш йӧным пуыман, нунылан кумылаҥдыше пашадарым тӱлыман. Тыгак пашам темлыше организаций гыч самырык специалистлан (ял гыч толшылан олаште) илаш верым ойырыман, очыни. А эн тӱҥжӧ — ӱдыр-рвезе-влаклан чолгарак лийман, ала-кӧ деч полышым вучыман огыл, а шокшым кергалтен, йӧным муын моштыман. А.Байкова.
Авторын фотожо.
