КРИМИНАЛ

Окса шинчам йымыктара

Кодшо кечылаште Йошкар-Оласе кок организацийыште еҥ-влакын оксаштым шолышт каеныт.

Ленин проспектыште верланыше организацийыштыже вор директорын кабинетышкыжак пураш лӱдын огыл. Тушеч тудо 5000 теҥге наре оксам налын лектын. Ӱдырамаш пошкудо пӧлемыш каен да тушто телефон дене мутланен улмаш. Тиде жапыште омсажым тӱкылен огыл. Осал шонымашан еҥ тидын дене пайдаланен да, пурымекше, улшо кӱртньӧ яшлыкым почынат, тушто аралалтше оксам налын каен.

Кодшо кеҥежым мемнан дене Печать пӧртыштат ик пӧръеҥ почмо кабинет еда коштын савырнен да иктыж гыч оксам налын каен ыле. Угыч тиде еҥак лийын огыл дыр?..

Вес тыгаяк томаша Строитель уремыште верланыше ик офисыште лийын. Тушто пашаеҥ-влакын кечываллан кочкаш кайымекышт, вор-шамыч пӧлемыш омсам ирен пуреныт да 30 тӱжем утла теҥгем шолышт лектыныт.

Л.Камалетдинова.

Опубликовать в Одноклассники