Мыняр тӱлат?
Техникумым тунем пытарыше эргым специальностьшылан келшыше пашам муын огеш керт, сандене окса шотышто изишак чӱдынрак илена. Кеч пособийым налаш тӱҥалат манын, мый тудлан Калыклан паша верым ситарыме рӱдерын учётышкыжо шогалаш темлем. Каласыза, пожалуйста, кызыт пашадымылык шотышто пособийын кугытшо могайрак?
А.Никитина.
Параньга район.
2017 ийыште пашадымылык шотышто пособийын эн изи кугытшо – 850 теҥге, эн кугу кугытшо – 4900 теҥге. Россий Федерацийын Паша министерствыже пашадымылык шотышто пособийын кугытшым 2018 ийыштат тыгайымак кодаш темла.
Ушештарена, пособийын кугытшым ий еда правительстве пеҥгыдемда. Пашадымылык шотышто пособийым пытартыш гана 2009 ийыште индексироватлыме, тымарте тудын эн изи кугытшо 781 теҥге, эн кугу кугытшо 3124 теҥге лийын.
Пашадымылык шотышто пособийын кугытшо нерген проектым Нормативный акт-влак проектын федеральный порталышкыже вераҥдыме. Тиде документ шотышто шке шонымашым 12 август марте возаш лиеш.
М.ИВАНОВА.
