УВЕР ЙОГЫН

«Марий калыкын илышыже»

11 апрель гыч 9 май марте Йошкар-Оласе изобразительный искусство тоштерыште калыкнан илыш корныж дене палдарыше ончер пашам ышта. Самырык сӱретче Татьяна Мартьянова творческий пашаже-влакым ик проектыш чумырен.

Тӱрлӧ пагытыште возымо паша-влакым ик тематике уша. Сӱретче марий калыкын религийжым, тӱвыражым, илышыжым шымлен иктешлен да художественный образ-влак гоч чыла тидым шке пашалаштыже ончыктен.  Ончер кум ужаш гыч шога: «Тыглай илыш да ыштыш-кучыш», «Пайрем ден йӱла-влак», «Астральный культ да мифологий». Проектын тӱҥ шонымашыже: марий калыкын илыш йӱла радамжым шотыш налын, мландывалсе илышыжым кавасе да умылаш лийдыме вийлан ӱшанымыжым ончыкташ. Сӱрет-влакым ончышо тыглай еҥын лач тыгаяк шонымаш лектеш. Авторын южо сӱретыште ончыктымо образше-влак поснак ӧрыктарат.  

Татьяна Мартьянова эскиз ден графический ӥоным кучылтеш. Шкенжын палемдымыже почеш, ты проектлан ончер дене точкым шынден. 2015 ийыште тудо Строганов лӱмеш Москосо художественно-промышленный академийыште нине паша дене дипломым арален. Ончыкыжым марий калыкын тӱвыраж дене кылдалтше темым умбакыже шымлаш шона да шке творческий пашаштыже эҥерташ тӱҥалеш.

Татьяна шкеже Йошкар-Олаште шочын-кушкын. Йошкар-Оласе 2-шо номеран художественный школым, вара художественный училищым тунем лектын. Академий деч вара Т.Евсеев лӱмеш национальный тоштерыште сӱретчылан ыштен. Кызыт «Студия 158» организацийыште иллюстраторлан тырша.

С.Носова.

Снимкылаште: Т.Марьянован пашаже-влак. 

М.Скобелевын фотожо.

Опубликовать в Одноклассники