Республикысе курчак театр 75 ияш лӱмгечыже вашеш Марий Эл Республикын колыштмо-ончымо документ-влак кугыжаныш архивше дене пырля электрон изданийым (дискым) ямдылен.
Тушто театрын историйже, тудын пашаеҥже да артистше-влакын (кудышт 20 ий утла пашам ыштеныт да ыштат) илыш-корнышт дене палыме лийын кертына. Тыгак Курчак театрыште 75 ий жапыште ончыкталтше постановко, спектакльлан ямдылыме афише ден программе-влакымат ужаш да театрын пашам ышташ тӱҥалмыж деч тӱҥалын тачысе кече марте вашталтмыжым таҥастараш лиеш.
Электрон изданийыш 1942 ий гыч 2017 ий марте документ-влакым: 261 фотокартычке, 36 архив документ, 118 иллюстраций, 37 печатлыме материал да 16 видеозапись — пуртымо.
— Материалым Т.Евсеев лӱмеш национальный, Йошкар-Ола историй тоштер-влак, Курчак театрын да артист-влакын архивышт гыч материалым чумыренна, тыгак Москосо А.Бахрушин лӱмеш рӱдӧ театр тоштерышкат миен коштынна, — палемдыш дискым лукмылан вуйын шогышо-влак кокал гыч иктыже, театрын сылнымут пӧлкажым вуйлатыше Ирина Суворова.
Дискын презентацийыштыже Курчак театрын икымше режиссержо Василий Илисавскийын ӱдыржӧ, Валерия Васильевна, лийын. Тудо ачажын пашам ыштыме годсо жап гыч икмыняр документым да фотографийым, икымше марий спектакль («Мондалтше ава») афишым пӧлеклыш.
— Театр полат моткоч сӧрал, йоҥгыдо, замок дене таҥастараш лиеш, — палемдыш режиссерын ӱдыржӧ.
Республикысе курчак театр лӱмгечыжлан пӧлеклалтше пайремым 19 майыште эртара.
А.Байкова.
(Фотом театрын архивше гыч налме.)
