Кугыжаныш Думын депутатше-влак Российысе олалаште турист отрасльым вияҥдыме йодышым каҥашеныт. Марий Эл деч депутат Виктор Кидяев сай пример шотеш мемнан регионын турист йӧнжым кучылтмым конден.
«Единая Россия» фракций вуйлатышын икымше алмаштышыже Виктор Кидяевын верыш лектын эртарыме заседанийже тиде темылан пӧлеклалтын. Тудо Москва областьысе Сергиев Посад олаште лийын. Мийыше-влак икмыняр исторический памятник ден культовыйлан шотлалтше объектым ончен савырненыт.
«Золотое кольцосо» ола-влак кокла гыч шукыштыжо турист ден паломник-шамычын толын коштмышт тӱҥ парышым пуа. Тудын пӱтынь кумдыкшым эшеат чапландараш да еҥ-влаклан толаш йӧнанракым ышташ кӱлеш», — палемден Виктор Кидяев.
Ойлымыж почеш, ты кундемыште веле огыл, шуко курыман историй, культур да архитектур памятник-влак дене турист-влакым сымыстарыше Российысе ятыр олаште турист-влаклан йӧнан условийым ыштыман.
«Элнан тӱрлӧ регионжо гыч турист-влакым толаш сымыстарымаш – Марий Элын стратегический задачыже-влак кокла гыч иктыже. Ӱмаште гына Марий Элыш 610 тӱжем утла турист толын каен. Сувенир сатум налмышт, тоштерлаште лиймышт, турист маршрутла дене коштмышт, тӱшкагудылаште илымыштлан тыште кодымо оксашт – регионын экономикышкыже ешартыш. Кызыт Йошкар-Ола уна-влакын кумылыштым ойыртемалтше архитектур тӱсшӧ дене савыра. Тений Морко районышто у маршрут почылтеш. Тудо «Туштан Марий Эл» маналташ тӱҥалеш. Турист-влакым Карман курыкыш намиен коштыктат, тӱняште эн яндар Вонча эҥерым ончыктат. Тыгак нунылан, лагерьым ыштен, колым кучаш темлат. Ты пагытын «изюминкыже» — кок у туристический бренд: тиде — «Йошкар-Ола – столица возрождения» да «Земля, рождённая небом», — ойлен Виктор Кидяев.
Л.Камалетдинова.
