10 июньышто Э.Сапаев лӱмеш опер да балет театр Килемар районысо Арда селасе «Раздолье» турист комплексыште «Акпатыр» спектакльым ончыктен. Тидыже — тусо кундемыште илыше-влаклан веле огыл, уло марий калыклан кугу событий. Вет молгунамсе семын марий калыкнан илышыж нерген каласкалыше постановкым сценысе декораций огыл, а пӱртӱс сылнештарен.
Тӱҥ партийым Владислав Калашников (Акпатыр), Александр Столбов (Эвай), Елена Никитина (Эвика) муреныт.
Спектакль кече шичме жапыште тӱҥалын, сандене мланде ден кава ушнымаште йошкаргыше кечыйол, эҥерысе вӱдтолкын, сер воктенсе леве мардеж, рӱмбалгыме жапыште чыл-чол койын волгалтше тулото чоным куандарен. А шӱшпык-влакын сылне йӱкышт кузе торашке йоҥгалтын! Оркестр (дирижер Григорий Архипов) дене ӱчаш-ӱчаш музыкым луктыныт, пуйто музыкант-влакын шоктымыштым умбакыже шуеныт.
Оперысе герой-влакын ош вынер тувырышт пӱртӱсын моторлыкшо дене келшен толын. Спектакльыште огыл, а чылажат илышыште лийме семынак чучын: еҥ-влак пӱртӱсыштӧ иленыт, пашам ыштеныт, йӧратеныт, Шочмо элыштым араленыт.
Э.Сапаев лӱмеш опер да балет театрын труппыжо кеҥеж тургымышто кажне ийын тӱрлӧ спектакльым кава йымалне ончыкта. А тиде паша, мутат уке, поснак ойыртемалтше. Сандене тидым театрын визитный картычкыже семынат шотлаш лиеш.
«Акпытыр» нерген ончаш мийыше-влакын шомакышт:
Наталья Вохминцева, Йошкар-Ола:
— Чонышто каласен моштыдымо шижмаш озаланен. Марий кундемнан моторлыкшо, шочмо йылме дене йоҥгалтше шомак-влак, чонлан лишыл пӱртӱс, тудын шокшыжо, вийже эшеат шергын чучын да кугешнаш амалым ыштен. Ты кастене театрын артистше-влак пуйто спектакльыштат модын огытыл, пуйто чылажат илышыште лийын, пуйто ик жаплан ме XVIII курымыш вонченна. Спектакль деч вара артист-влак дене мутланаш, войзалташат йӧн лийын.
Игорь Суринов, Килемар район:
— Сай игече, мотор пуртӱс, опер муро, куштымаш, ончышо-влак… — чылажат ты кечын Арда эҥер воктене калыкым куандарен. Опер да балет театрын сай пашажым аклен, шыҥа-влакат пуйто куаненыт, вӱд воктене сайынак витарышт.
Имне-влак, тулото, лӱйкалыше пушко, факел, пуш да молат — лач нине огыт сите театр сценыште.
Икманаш, театр моткоч кугу пашам ыштен.
Алевтина Байкова.
Е.Никифоровын фотожо.
