Рўдӧ каныме паркыште эртаралтше «Кудо» конкурсышто, Юрино да Курыкмарий деч посна, теният республикысе латкок район пайремыш толшо калыклан шке кундемжын тукым гыч тукымыш вончышо ойыртемалтше илыш-йўлажым ончыктыш. Кажныже шке кудо кумдыкшым ялозанлыкыште кучылталтше ўзгарже, ожнысо да кызытсе илышыж дене палдарыше вургемже, арверже, тўржӧ, станок дене куымо шартыш дене сылнын сӧрастарен.Тўрлӧ мелна, шўраш, торык когыльо, шыл-шўраш кӧрган палыш, чуҥга, кукшо туара да моло шуко тўрлӧ национальный кочкыш дене поян ўстелым поген, жюри ден ўжмӧ уна-влакым, пайремыш толшо-шамычым сийлен. Ик посна йўлалан эҥертен, кажне район шкенжын ойыртемалтше сынжым ончыкташ тыршен. Кўнчылам шўдырымӧ, тўрым тўрлымӧ, кўвар шартышым куымо мастер-классым эртарен.
Жюри председатель, драматург А.Петров, член-влак писатель Ю.Соловьев, культур пашаеҥ Р.Сапаева, журналист Э.Терентьева, «Сурт-пече» газетын шеф-редакторжо Р.Чепакова, ўжмӧ уна-влак ялозанлык министр Ю.Сидыганов, алмаштышыже А.Кондратенко, Оньыжа Э.Александров дене пырля Медведево район кудын «Унам вашлиймаш» йўлам ончыктымыж гыч аклыме пашам тўҥале. Провой кундемын озаватыже-влак олан мэрже Е.Масловым Юл эҥерыште кучымо тамле шокшо кол шўр, когыльо дене сийленыт да «Йогор чўчў дек унала» сценкым ончыктеныт. Ик «кудывече» гыч весыш куснышо жюрилан Волжский районын тўвыра пашаеҥже-влак каче суртыш наҥгайышаш оръеҥ шовыч дене вуйым леведме, ача-аван у ешлан сугыньым пуымо «™дырым ужатыме» йўлам ончыктеныт. Ик кудо гыч весыш куснен, чесым ямдылыме, мурен-куштымо, унам сийлыме мастарлыкым ончен, ўжмӧ уна-влакынат мотор марий сем почеш муралтен-кушталташ кумылышт лектын. Кужэҥер район «кудывечыш» пурымеке, тале гармонист дене пырля ялозанлык министр Ю.Сидыганов (снимкыште), тўмырым рашкан кырен, землячкыже-влакым сўан сем почеш куштыктыш. Шернур, У Торъял, Марий Турек, Параньга да моло район гыч толшо-влакын мурен-куштымышт почеш унам сийлымыштым калык куанен ончен.
Шке район ойыртемжым шотыш налын, Морко район гыч кажне ийын конкурсыш лийже манынак ямдылалт толыт. Иктаж уым шонен муын, калыкым ӧрыктарен куандарат. Теният «™дыр сий» йўлам ончаш калык «кудывече» йыр тич погыныш.
Тўрлӧ район гыч кондымо тутло национальный кочкышым тамлен ончен, кинде-шинчал дене уна-влакым порын вашлийме шот-ратым эскерен, жюри икымше вер дене Звенигово районым палемдыш (кўшыл снимкыште). Жюри председатель А.Петров сцене гоч нунылан пӧлеклан газ плитам кучыктыш. Морко район гыч толшо-шамычым кокымшо вер дене саламлен, мангал ден шўйым пуыш. Кумшо верыш лекше Волжский районын участникше-влакым дренажный насос дене куандарыш. Моло район-шамычымат пӧлек деч посна ышт колто.
Р.Чепакова.
М.Скобелев ден Д.Речкинын фотошт.
